Elektromobıldi symsyz zarıadtaıtyn qurylǵy jasaldy
ASTANA. KAZINFORM — Qytaı men Ulybrıtanııa ǵalymdary elektromobılderge arnalǵan symsyz zarıadtaý júıesin oılap tapty, dep habarlaıdy Kazinform agenttiginiń Beıjińdegi menshikti tilshisi Xinhua-ǵa silteme jasap.
Qytaı men Ulybrıtanııa ǵalymdary jańa energııa kózderimen júretin kólikterge arnalǵan tıimdiligi 98,51% bolatyn symsyz zarıadtaý júıesin ázirledi.
20 kVt qýatqa ıe qurylǵy nanokrıstaldy qorytpalar negizinde jasalǵan. Jobaǵa Dýngýan materıaltaný jáne tehnologııalar ınstıtýtynyń, Qytaı Ǵylym akademııasy Fızıka ınstıtýtynyń, Gonkong qalalyq ýnıversıtetiniń jáne Kembrıdj ýnıversıtetiniń mamandary qatysty.
Ǵalymdar jasaǵan magnıttik jolaqtyń uzyndyǵy 440 mm, eni 330 mm, qalyńdyǵy 4 mm. Bul dástúrli ferrıtti sheshimderden eki ese juqa. Sonymen qatar ol menshikti qýaty joǵary energııany bere alady.
Energııany janaspaıtyn ındýktsııalyq jolmen berý zarıadtaý protsesin tolyq avtomattandyrýǵa múmkindik beredi. Ázirleýshilerdiń aıtýynsha, bul tehnologııa júrgizýshisiz kólikterdi jappaı kommertsııalyq qoldanysqa engizýdiń negizgi sharttarynyń biri bolmaq.
Elektromobılderden bólek, júıeni temirjol kóliginde, ónerkásiptik robottarda jáne ushqyshsyz avıatsııada qoldaný josparlanyp otyr.
Qazir Dýngýan materıaltaný jáne tehnologııalar ınstıtýty ázirlemeni kommertsııalandyrýmen jáne óndiriste engizýmen aınalysyp jatyr. Injenerler júıeniń tıimdiligi men tehnıkalyq sıpattamalaryn odan ári jaqsartýdy da josparlap otyr.
Buǵan deıin Qytaıda elektromobılderge arnalǵan qýattaý qurylǵylarynyń sany 23,68 mıllıonǵa jetkeni habarlanǵan edi.
