Elektromobıldi qýattaýǵa qansha tóleıtinińiz endi qatań tekseriledi
ASTANA. KAZINFORM — 1 jeltoqsannan bastap elektromobılderdi qýattaý stantsııalary mindetti tekserýden ótedi, dep habarlaıdy Saýda jáne ıntegratsııa mınıstrliginiń baspasóz qyzmeti.
Qazaqstanda elektromobılderdi qýattaý stantsııalaryndaǵy ólsheý dáldigine qoıylatyn jańa talaptar engiziledi.
2026 jylǵy 1 jeltoqsannan bastap elektromobıldi qýattaý kezinde júrgiziletin ólsheýler memlekettik retteý salasyna jatady. Osyǵan baılanysty qýattaý kezinde qoldanylatyn ólshem quraldary mindetti tekserýden ótedi. Tıisti talaptar Saýda jáne ıntegratsııa mınıstriniń 2026 jylǵy 25 qyrkúıektegi № 272-NQ «Memlekettik retteýge jatatyn ólshemder tizbesin bekitý týraly» buıryǵymen belgilengen.
Jańa talaptar eń aldymen elektromobılderdi qýattaý kezinde júrgiziletin tólemniń durystyǵyn qamtamasyz etýge jáne tutynýshylardyń quqyqtaryn qorǵaýǵa baǵyttalǵan. Búginde elektromobıldi qýattaý quny berilgen elektr energııasynyń kólemine baılanysty esepteledi. Sondyqtan tutynýshyǵa kórsetiletin qyzmettiń qunyn anyqtaý kezinde paıdalanylatyn jabdyq elektr energııasynyń kólemin dál ólsheýi kerek.
— Jańa talaptarǵa sáıkes, elektromobılge berilgen elektr energııasynyń kólemin esepke alatyn ólshem quraldary belgilengen metrologııalyq talaptarǵa saı bolýy jáne ýaqtyly tekserýden ótýi qajet. Qurylǵylardy tekserý olardyń jaramdylyǵyn, belgilengen dáldik sheginde jumys isteıtinin jáne elektromobılge berilgen elektr energııasynyń naqty kólemin durys kórsetetinin anyqtaıdy. Bul tutynýshynyń kóligin qýattaý kezinde naqty berilgen elektr energııasynyń kólemine ǵana aqy tóleýine kepildik beredi, — delingen habarlamada.
Elektr qýatyn qýattaý stantsııalarynyń ıeleri men operatorlary paıdalanylatyn ólshem quraldarynyń belgilengen talaptarǵa sáıkestigin baqylap, olardyń ýaqtyly tekserýden ótýin qamtamasyz etýi tıis. Al elektromobıl ıeleri úshin bul ózgerister tóleý kezinde týyndaýy múmkin qatelikterden qosymsha qorǵanys berip, jabdyq kórsetkishteriniń durystyǵyna degen senimdi arttyrady.
Elektr kóligi men qýattaý ınfraqurylymy qarqyndy damyp jatqan kezeńde ólsheýlerge qoıylatyn mindetti talaptardy engizý ózekti. Qýattaý stantsııalarynyń sany artqan saıyn naryqtaǵy qyzmet kórsetý tártibi de birizdenip, operator men tutynýshy arasyndaǵy tólem dáldigi men ashyqtyǵyn qamtamasyz etýge baǵyttalǵan talaptar qalyptasyp jatyr.
Osyǵan deıin Qazaqstanda kún energııasymen qýat alatyn elektromobıl stantsııalarynyń jelisi keńeıetini aıtyldy.
