Elektromobıl qarapaıym halyq úshin qymbat- Ádilbek Básekeev
NUR-SULTAN. QazAqparat -Qazaqstandyqtar úshin elektromobıldi tizgindeý ázirge qymbat. Bul týraly Halyqaralyq jasyl tehnologııalar jáne ınvestıtsııalyq jobalar ortalyǵynyń apparat basshysy Ádilbek Básekeev aıtty, dep habarlaıdy QazAqparat tilshisi.
Jasyl Jol jobasynyń avtory elektromobılder sany boıynsha álemde Ulybrıtanııa, Norvegııa, Germanııa, Kosta-Rıka, Chılı, jáne Qytaı kósh bastap turǵanyn aıtady.
«Qazaqstanǵa bul tizimge kirý úshin áýeli qajetti ınfraqurylymdy damytý kerek. Ázirge elektromobıl qarapaıym qazaqstandyqtar úshin qymbat. Tek bizde ǵana emes, álemniń kóptegen elderinde solaı. Kóliktiń ózi emes, qýattaıtyn batareıasy óte qymbat. Búkil álem sony arzandatýǵa bas qatyryp jatyr», - deıdi ol.
Eske salsaq, ortalyq kommýnkatsııalar qyzmetinde ótken baspasóz máslıhatynda Ádilbek Básekeev elektromobıl ıelerine tegin turaq usynylýy múmkin ekenin aıtqan bolatyn.
