Elektromobıl ıelerine tegin avtoturaq usynylýy múmkin
NUR-SULTAN. QazAqparat - Norvegııanyń elektromobıl ıelerine tegin turaq usyný jobasy Qazaqstanda da júzege asýy múmkin. Bul týraly Jasyl Jol elektromobılder sherýiniń ıdeıa avtory Ádilbek Básekeev ortalyq kommýnıkatsııalar qyzmetinde ótken baspasóz máslıhatynda aıtty, dep habarlaıdy QazAqparat tilshisi.
Halyqaralyq jasyl tehnologııalar jáne ınvestıtsııalyq jobalar ortalyǵynyń apparat basshysy Ádilbek Básekeevtiń aıtýynsha, eldegi elektromobılderdiń jalpy kólik qatynasyndaǵy úlesi 1 paıyzǵa da jetpeıtin kórinedi. Al JAK markasymen otandyq elektromobıl qurastyratyn «SaryarqaAvtoProm» JShS-niń ónimine degen suranys sońǵy bir jylda qaıta túsip ketken.
«Bul olqylyqtardyń ornyn toltyrý úshin Norvegııanyń tájirıbesin qoldanýǵa bolady. Ol elde kólikterdiń 80 paıyzy elektrmen júredi. Soǵan qaramastan, elektromobıl tizgindegen júrgizýshilerge barlyq turaqtar tegin qyzmet kórsetedi. Tipti keı qalalarda elektromobılderge ǵana arnalǵan jolaqtar qarastyrylǵan. Mundaı jobany bizdegi jasyl ekonomıkany qoldaýshy uıymdar Parlamentke usynyp jatyr. Ázirge ońdy sheshim shyqpaǵanymen, tyńǵylyqty jumys júrip jatyr», - deıdi ol.
Al atalmysh ortalyq basshysynyń orynbasary Gaýhar Baıseeva elektromobıldi qýattaý beketterin ornatý boıynsha «QazMunaıGaz» basshylyǵymen naqty kelisimder jasalǵanyn aıtady.
«Ázirge janarmaı quıý stansalaryn mundaı iske mindetteý múmkin emes. Bári suranysqa baılanysty. Bıznes tek suranysqa ǵana baǵynady. Alaıda, «Gelıos» janarmaı quıý jelisi bizdiń bastamamyzǵa qyzyǵýshylyq tanytyp otyr», - deıdi ol.
