Elektromobıl ıeleri turaqta aqy tóleýden bosatylady – Senat
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine kólik jáne elektrmobılderge arnalǵan ınfraqurylymdy damytý máseleleri boıynsha ózgerister men tolyqtyrýlar engizý týraly» Zańy men ilespe qujat eki oqylymda qaralyp, maquldandy.
Atalǵan zańdardyń negizgi maqsaty — elimizde ekologııalyq taza kólikti tanymal etý jáne elektromobılderge arnalǵan ınfraqurylymdy damytýdyń quqyqtyq negizderin bekitý.
«2023 jyldyń 1 qańtarynda elimizde elektr qozǵaltqyshpen 812 jeńil kólik tirkelse, qazirgi kezde 9 myńnan astam elektr kóligi bar. Osy derekter elektromobıl sanynyń kún sanap eselenip óskendigin kórsetip otyr. Bul degenimiz, memleket jaǵynan elektromobılderge arnalǵan ınfraqurylymdy damytýdy talap etedi», — dedi senator Sultan Dúısembınov.
Negizgi zańda kelesideı zańnamalyq normalar qarastyrylǵan:
— ortaq paıdalanylatyn jer ýchaskelerin elektrmobılder úshin berý, elektrqýattaý stantsııalaryn ornalastyrý, onyń ishinde erekshe qorǵalatyn tabıǵı aýmaqtar jerlerinde ornalastyrý máseleleri;
— «elektromobıl» jáne «elektrozarıadty stantsııa» uǵymdaryn engizý;
— kommýnaldyq aqyly avtoturaqtarda elektromobıl kóliginiń ıeleri úshin tegin turaq oryndaryn paıdalaný;
— turǵyn aımaqtardaǵy qýattaý stantsııalaryn jobalaý, ornatý jáne tehnıkalyq paıdalaný erejelerin ázirleý ári bekitý boıynsha memlekettik organdardyń ókilettiligin anyqtaý;
— jergilikti atqarýshy organdarǵa elektrqýattaý stantsııalaryn ornalastyrý týraly sheshim qabyldaý, sondaı-aq elektrqýattaý stantsııalary úshin ınjenerlik ınfraqurylym uıymdastyrýdy qamtamasyz etý boıynsha ókilettikter berý.
«Sonymen qatar „Ákimshilik quqyq buzýshylyq týraly Qazaqstan Respýblıkasynyń Kodeksine tolyqtyrý engizý týraly“ ilespe Zań elektr jelilerine óz betinshe qosylǵany úshin, sondaı-aq elektrqýattaý stantsııalarymen jabdyqtalǵan oryndarda kólik quraldaryn toqtatý nemese turaqqa qoıý erejelerin buzǵany úshin ákimshilik jaýapkershilikti engizý maqsatynda ázirlengen», — dedi depýtat.
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń málimetinshe, «Jol qozǵalysy týraly» Zańǵa «elektrmobıl» uǵymy engiziledi.
Azamattardyń mynadaı jeńildikti sanattaryn kólik quraldarynyń orynturaǵyn paıdalanǵany úshin tólemaqydan bosatý usynyldy: Uly Otan soǵysynyń ardagerleri, basqa memleketterdiń aýmaǵyndaǵy urys qımyldarynyń ardagerleri, jeńildikteri boıynsha Uly Otan soǵysynyń ardagerlerine teńestirilgen ardagerler, eńbek ardagerleri, І jáne ІІ toptaǵy múgedektigi bar adamdar: múgedektigi bar balanyń zańdy ókilderi, kóp balaly analar, Semeı ıadrolyq synaq polıgonyndaǵy ıadrolyq synaqtardyń saldarynan zardap shekken azamattar, elektrmobılderdiń ıeleri.
Munymen qosa, «Tb» jáne «D» sanattarynyń júrgizýshilerine joǵary suranys máselesin sheshý maqsatynda avtokólik quraldaryn basqarýǵa ruqsat berý úshin talaptar 23 jastan bastalatyn bolyp jeńildetildi, sondaı-aq júrgizýshiniń jumys ótili 3 jylǵa deıin, «D1» kishi sanatyna keminde bir jylǵa deıin qysqartyldy.
Atalǵan zańdardar kúshine ense, elimizde elektromobılder sanynyń artýyna jáne arnaıy ınfraqurylymdy damytýǵa yqpal etedi. Bul óz kezeginde qorshaǵan ortaǵa keletin zalaldy azaıtyp, halyq arasynda jasyl kólikterge degen suranysty arttyrady.
