Elektromobıldi kólikterdiń sany 2020 jylǵa qaraı 1 mıllıonǵa jetedi
ASTANA. QazAqparat - Germanııada 2020 jylǵa qaraı elektr kólikteriniń sany 1 mıllıonǵa jetýi múmkin, dep habarlady www.24.kz.
Nemis úkimeti 5 jyldan keıin mundaı múmkindikke jeńildikterdiń arqasynda ıe bolamyz dep otyr. Endi ekologııalyq jaǵynan tıimdi temir tulparlardy ıeleri turaqtarǵa tegin qoıa alady ári qoǵamdyq kólik jolymen aqysyz júrýge ruqsat berildi. Býndestag osyndaı zań jobasyn qabyldady. Al nemis azamattarynyń ózderi eldegi eleýli ózgeriske daıyn ba? 33 jastaǵy Aleksandr Istomın tájirıbeli júrgizýshi. Ol osy ýaqytqa deıin álemdik markadaǵy kóptegen temir tulpardy tizgindep kórgen. Biraq 2 jyldan beri myna qarapaıym kólikti taqymyna basyp júr. Іsker jigit jer talǵamaıtyn Djıpin qazirgi elektrokarǵa qýana-qýana aýystyrdy. Bárinen buryn shaǵyn kólemi men shyǵyny azdyǵy qyzyqtyrypty.
«Elektromobıl unaıdy. Týystarym shaǵyn kóligimdi kórip qatty tańyrqady. Biraq ol óte yńǵaıly jáne tıimdi jaǵy kóp. Salyq tóleýdiń qajeti joq. Demalysta qalany qydyryp uzaq júremin. Buryn mundaıǵa shyǵyn kóp ketetin. Al arnaıy qýattandyrǵysh beketteri keńsemniń qasynda», - deıdi kásipker Aleksandr Istomın.
Elektrokardy úıdegi 220 volttyq toqpen qýattaýǵa da bolady. Akkýmýlıator tolyq bolsa, 150 shaqyrymdy oılanbaı júresiz. Ekologııaǵa zııany joq, únemdi ári jyldam. Taǵy bir artyqshylyǵy - maıyn aýystyryp áýre bolmaısyz. Baǵasy qymbat bolǵanymen Germanııada mundaı kólikterdiń sany jyl saıyn artyp keledi. 2011 jyly olardyń sany 2307 bolsa, 1 jyldan soń 2 esege kóbeıgen. Aldyńǵy jyly 7 myń 114-ke jetip, byltyr 24 myń elektr kóligi tirkelgen. BMV avtokontserni suranys bıyl da joǵary bolady dep otyr. «Ekomodeldi kólikterdi alý kezegi jarty jylǵa deıin bos emes», - deıdi.
