Elektromehanık qalaı iri kompanııanyń bas dırektory atandy: Aleksandr Hmelevpen suhbat

- Negizgi mamandyǵyńyz qandaı? Qaı jerde bilim aldyńyz?

- Novosıbırsk memlekettik ýnıversıtetinde «Ekonomıkalyq kıbernetıka» mamandyǵy boıynsha bilim aldym. Ol oqý ornyn 1986 jyly támámdadyq. Sodan keıin Óskemendegi qorǵasyn-myrysh kombınatyna jumysqa ornalastym. Osylaı eńbek jolym bastaldy. Alǵashynda elektromehanık bolyp eńbek ettim. Ary qaraı ınjener-programmıst, bas býhgalter, qarjy jónindegi vıtse-prezıdent jáne atqarýshy dırektor boldyq. 2014 jyldan beri bas dırektor laýazymyn atqarýdamyn.

- Osyndaı jetistikke jetýdiń qupııasy nede?

- Eshqandaı qupııa joq. Tek aıanbaı eńbek etý qajet. Bala kúnimnen osyny kózdep, soǵan jetý úshin jospar qurdym dep ótirik aıtpaıa qoıaıyn. Ózimniń mundaı laýazymǵa qalaı jetkenimdi bilmeı de qaldym. Adam kerek kezde kerek jerde bola bilýi kerek eken.

- Al jalpy taý-ken metallýrgııasyna degen qyzyǵýshylyǵyńyz qalaı oıandy?

- Shynymdy aıtsam, metallýrgter men kenshiler jaıly tek keńestik kınolardan ǵana bilip óstik. Sebebi balalyq shaǵym Novosibir qalasynda ótti. Joǵarǵy oqý ornyn támámdaǵan soń óz erkimmen osynda jumysqa keldim. Al buǵan deıin Qazaqstanǵa taban tirep kórmegenmin. Mine, sodan beri eńbek etip kelemiz.

Sol kezde bireý maǵan ómiriń osylaı bolady dese senbes edim. Negizi qarshadaıymnan kompıýterlik baǵdarlamashy bolǵym keletin. Alaıda taǵdyrdyń mańdaıǵa jazǵany osy eken. Tehnologııa damyǵan ýaqytta osy salaǵa qatysty bilimim de jumysqa kóp kómegin tıgizip jatyr.

- Іri kompanııada basshy bolýdyń qıyny ne?

- Menińshe, basshy degen eń birinshi kezekte adammen baılanys ornatyp, til tabysa bilýi qajet. Qolastyńdaǵylardan naqty neni qalaıtynyńdy túsindirip, olarǵa sondaı jetistikke jetý úshin durys baǵdar bergen abzal. Komandalyq jumysty jaqsy júrgizý úshin adamdardyń maqsattaryn biriktirip, ortaq ıdeıaǵa jumyldyrǵan jón.

Sodan keıin basshylarǵa qıyny – qyzmetkerleriniń aıtqanyna qulaq túre bilý. Keıbireýler ózderin eń bilimdi sanap ketedi. Bul durys emes. Mende ondaı másele múlde joq. Sebebi jańa aıtqanymdaı, oqyǵan mamandyǵym – ekonomıkalyq kıbernetıka, al qolastymdaǵylar – tehnologtar. Sondyqtan olarmen bilim jarystyra almaımyn. Alaıda ujymdaǵylardyń da pikirleri san alýan bolyp jatady. Maqsatym – aıtqandaryn tyńdap, sarapqa salyp, tıimdi joldy tańdaý.

- Sonda ujymnyń tizginin ustap otyrǵan adam ádiletti tóreshi, bilikti psıholog bola bilý kerek deısiz ǵoı?

- Iá. Basshy degen bireýdiń jumysyna tikeleı aralaspaǵan jón. Sebebi sol laýazymda otyrǵan adam óz jumysyn saǵan qaraǵanda jaqsy biledi. Mysaly, qolǵa kúrek alý ońaı. Biraq ol kúrekpen neni alyp, qaıda laqtyrý kerektigin túsiný kerek. Buny men bala kezimde qurylysta jumys istegende túsindim. Kirpishtiń ózin durys laqtyra bilý qajet. Sondyqtan bastyqtyń mindeti – oǵan jumys isteýge qolaıly jaǵdaı jasap, qajetti kómek kórsetý.

- Jumystan sharshap, qoldy bir siltegińiz kelgen sátter boldy ma?

- Boldy. Biraq ol oıymnan bas tartyp, baǵytymnyń durys ekendigine kóz jetkizdim. Ózińniń istegen jumysyńa kóńiliń tolmaı jatady. Alaıda túsingenim – esh ýaqytta emotsııaǵa erik berýge bolmaıdy. Ashý qysqan kezde sheshim qabyldamaǵan jón. Sabyrǵa kelgende ǵana salqynqandylyqpen bárin oı eleginen ótkizý kerek.

Taǵy bir aıta ketkim keletini, eń baǵaly resýrs – ýaqyt ekendigin umytpańyz. Ýaqytty keri qaıtara almaısyz. Sondyqtan ár sátti qadirleı bilgen abzal.

- Aldaǵy josparyńyz qandaı?

- Qazirgi ýaqytta kompanııamyz oń qarqynmen damyp kele jatyr. Biraq biz bárinen oq boıy ozyp turmyz dep aıtýǵa áste kelmes. Kez kelgen adam «mende bári keremet» degen kezde ary qaraı damymaı qalady. Sebebi ár nárseni odan da jaqsy qylyp isteýge bolady. Sol úshin kompanııa jumysyn odan ári ilgeriletý maqsatynda toqtamaı eńbek ete beremiz.

- Áńgimeńizge kóp rahmet!