Elektrolız zaýyty aýmaǵynda Pavlodar óńirindegi eń úlken aerografııa paıda boldy
ASTANA. QazAqparat - Eýrazııalyq Top (ERG) quramyndaǵy «Qazaqstan elektrolız zaýyty» AQ aýmaǵynda kásiporynnyń 10 jyldyǵyna arnalǵan «ART-festıvAL» sharasy ótti, dep habarlaıdy pavlodarnews.kz .
Kásiporynnyń baspasóz qyzmetiniń habarlaýynsha, shara barysynda ındýstrııa taqyrybyna arnalǵan 17 týyndy men ınstallıatsııadan turatyn ekspozıtsııa jáne zaýyttyń óndiristik tsehtarynyń qabyrǵalaryna salynǵan úlken kórkem týyndylar tanystyryldy. Avtorlar atalmysh sharaǵa bir aı boıy daıyndalǵan. Nátıjesinde pavlodarlyq úzdik aerografıster komandasy kásiporynnyń úsh óndiristik tsehynyń qabyrǵasyna kórkem kompozıtsııalar saldy. Aerografııanyń jalpy kólemi 1 000 sharshy metrdi quraıdy. Búgingi tańda bul Pavlodardaǵy eń úlken aerografııa bolyp tabylady. Sýretshiler óz týyndylaryn salýǵa 150 lıtr boıaý jumsaǵan.
"Maǵan Pavlodarda osyndaı aýqymda jumys jasaý múmkindigi alǵash ret usynyldy, - deıdi aerografıst-sýretshi Konstantın Aleksandrov. - Sýretshilerge óz týyndylaryn salýǵa jaǵdaı jasap berdi. Mundaı múmkindik óte sırek bolady. Meniń jolym boldy. Jas sýretshiler ınstallıatsııalarynda boksıt, áktas, alıýmınıı totyǵy, alıýmınıı men metallýrgterdiń jumys quraldaryn da paıdalanǵan. - Biz osy jobaǵa qatysqanymyzǵa óte qýanyshtymyz. Óndiristik jumys barysyn jan-tánimizben seziný úshin alıýmınıı metalyn óndirý protsesimen bastan-aıaq tanystyq. Endi biz osy óndiris týraly jaqsy habardarmyz. Óndiris mamandary men sýretshiler ártúrli mamandyq ıeleri bolǵanyna qaramastan, kásiporyn jumysyn erekshe kartına arqyly kórsetýge tyrysty", - dedi shyǵarmashylyq top jetekshisi, Pavlodar kórkemsýret kolledjiniń oqytýshysy Olga Kerımova.
ART-týyndylar tusaýkeseri Qazaqstan elektrolız zaýytyndaǵy qonaqtar eń jıi keletin ýchaskesinde ótti. Kásiporyn Ertis, Pavlodar óńiriniń tanymal orny bolyp tabylatyndyqtan, apta saıyn osy alańǵa ártúrli delegatsııa men mártebeli meımandar keledi. Endi tsehtardyń syrtqy kelbeti metallýrgııa alabynyń kelbetin odan ári asha tústi. «Qazaqstan elektrolız zaýyty» AQ-nyń prezıdenti Roman Romanovtyń aıtýynsha, kásiporyn 10 jyldyq mereıtoıyn túrli aktsııalar jáne áleýmettik qorǵaýǵa baǵyttalǵan is-sharalar uıymdastyrýmen atap ótýdi jón kórgen.
