Elektroenergııanyń sapasyn retteıtin qurylǵy ornatý qajet - KEGOC
ASTANA. QazAqparat - «KEGOK» AQ basqarma tóraǵasy Baqytjan Qajıev iri kásiporyndarǵa elektroenergııasynyń sapasyn retteıtin qurylǵy ornatýdy mindetteýdiń mańyzyn aıtyp berdi, dep habarlaıdy «QazAqparat» HAA tilshisi.
«Elektrmen jabdyqtaý sapasy boıynsha jyl saıyn máseleler qordalanyp keledi. Energııany tutyný men óndirý baǵytynda aıtarlyqtaı ózgerister engizip jatqany eskerilýi tıis. Kóptegen kásiporyndardyń ózi jelidegi elektroenergııanyń sapa boıynsha parametrlerine áser etip jatyr. Energııanyń balama kózderi de turaqty bolmaǵandyqtan, jelilerdiń jumysyna áserin beredi. Bunyń bári elektroenergııasynyń sapasyna qatysty jańa talaptarǵa jaýap berýdi týyndatady», - deıdi Baqytjan Qajıev.
Onyń aıtýynsha, atalǵan salada sapa boıynsha naqty ózgeris kerek. Qazaqstandy jaryqpen qamtamasyz etip otyrǵan keıbir kompanııalar elektroenergııanyń sapasyn retteıtin qurylǵylardy ornatyp jatyr. Bul qadam óz kezeginde jelilerdegi elektroenergetıkanyń sapa kórsetkishiniń buzylýyna jol bermeıdi.
«Bul óte mańyzdy másele. Qazirdiń ózinde kóptegen tutynýshylar óz aýmaqtarynda nemese úılerinde jelilik olqylyqtardy rettep otyratyn qurylǵylardy ornatyp jatyr. Menińshe, bul suraqty zańdy turǵyda bekitken abzal. Naryqtyń barlyq qatysýshylary elektroenergııanyń sapasyn retteıtin qurylǵy ornatýy kerek. Ol aıtarlyqtaı shyǵynǵa ákelip soqtyrmaıdy. Elektroenergııanyń sapasyna monıtorıng júrgizetin quzyrly organdy belgileý kerek», - deıdi KEGOC basshysy.
Basqarma tóraǵasy óz sózinde, elektronenergııanyń sapasyna tikeleı áser ete alatyn kásiporyndar jelige zııan tıgizbes úshin atalǵan qurylǵyny ornatý kerektigin aıtty.
«Bolmaǵan jaǵdaıda olarǵa sanktsııalyq aıyppul salynýy tıis. Biraq bul máseleni áli de talqylaǵan jón. Bul qadamǵa naryqtyń barlyq qatysýshylarymen, saýda-ónerkásiptik palatamen kelise otyryp, zańdy turǵyda barǵan abzal», - dep túıdi Baqytjan Qajıev.
