Elektrlendirýdiń 100 jyldyǵy: Qazaqstannyń energetıkalyq qýaty 23 myń MVt-tan asty
NUR-SULTAN. QazAqparat - 1920 jylǵy 22 jeltoqsanda Qazaqstandy elektrlendirý jospary qabyldandy, dep habarlaıdy QazAqparat tilshisi QR Energetıka mınıstrliginiń baspasóz qyzmetine silteme jasap.
Qazaqstan aýmaǵydaǵy alǵashqy gıdravlıkalyq stansa 1892 jyly salyndy. HH ǵasyrdyń basynda respýblıka aýmaǵyndaǵy barlyq elektr stansalarynyń qýaty 2,5 MVt-tan aspady. 1920 jyly Keńes odaǵyn elektrlendirý jospary qabyldandy, oǵan Qazaqstan Respýblıkasy kirdi. HH ǵasyrdyń 30-jyldaryna qaraı Qazaq KSR-degi elektr stansalarynyń qýaty 12,5 MVt-qa jetti. Búgingi tańda energetıkterdiń qajyrly eńbeginiń arqasynda Qazaqstannyń jalpy energetıkalyq qýaty 23 myń MVt-tan asady. 2020 jyly 105 mlrd kVt-tan astam elektr energııasyn óndirý josparlanyp otyr. Onyń 3 paıyzy jańartylatyn energııa kózderinen alynady.
Osynaý ataýly dataǵa oraı búgin QR Energetıka mınıstri Nurlan Noǵaev birqatar energetıktti, sala ardagerlerin energetıka júıesin damytýǵa qosqan úlesi úshin medaldarmen, tósbelgilermen jáne gramotalarmen marapattady.
Mınıstr quttyqtaý sózinde 1920 jyly qabyldanǵan elektrlendirý jospary elimizdiń óndiristik damýynyń negizi bolǵanyn jáne elektr energetıkalyq kesheniniń basym damýynyń negizin qalaǵanyn atap ótti.
«Bizdiń energetıkterimizdiń joǵary kásibı jáne qajyrly eńbeginiń arqasynda Qazaqstan osy qaǵıdattardy qazirgi ýaqytqa deıin ustanyp keledi. Elimizdiń energetıka salasy eń kúrdeli máselelerdi sheshedi, bizdiń azamattarymyzdy jylýmen jáne jaryqpen úzdiksiz qamtamasyz ete otyryp, iri ınjenerlik jobalardy júzege asyrady. Búgin biz jyldar boıy elimizdiń energetıkalyq júıesin óz qoldarymen jasaǵan adamdarǵa qurmet kórsetemiz», - dedi Nurlan Noǵaev.
Aıta keterligi, elektrlendirý josparynyń 100 jyldyǵyna oraı búgin saǵat 18:00-de «Habar» telearnasynda «Bizdiń zamanymyzdyń Prometeıi» atty fılmniń premerasy bolady.
