Elektrli samokattar kólik quraly retinde rettelmek: 1 shildeden bastap ne ózgeredi
ALMATY. KAZINFORM — Almatyda elektrli samokattardy paıdalanýǵa qatysty zańnamalyq ózgerister men jańa talaptar talqylandy.
Polıtsııa, prokýratýra, qala ákimdigi jáne kıksherıng kompanııalarynyń ókilderi qatysqan keńes kezinde samokattardy resmı túrde kólik quraly retinde tanýǵa baǵyttalǵan normalar sóz boldy. Jańa talaptar 1 shildeden bastap kúshine enedi. Olar jalǵa beriletin elektrli samokattardy paıdalaný tártibin birizdendirip, mindetti erejelerdi engizýdi kózdeıdi. Bıznes sýbektileri úshin ótpeli kezeń qarastyrylǵan.
Polıtsııanyń habarlaýynsha, talqylaý kezinde jol-kólik oqıǵalarynyń aldyn alý, paıdalanýshylardyń tártibin baqylaý, tsıfrlyq qadaǵalaý quraldaryn engizý jáne kıksherıng operatorlarynyń jaýapkershiligin kúsheıtý máseleleri negizgi nazarda boldy. Balamaly kóliktiń kóbeıýinen jol apattary men ákimshilik quqyq buzýshylyqtar da artqan.
2025 jyly Almatyda elektrli samokattardyń qatysýymen 386 jol-kólik oqıǵasy tirkeldi. Sonyń saldarynan 400-den astam adam túrli jaraqat alǵan.
Almaty polıtsııa departamentiniń dereginshe, jol qozǵalysy erejelerin buzǵany úshin samokat paıdalanýshylaryna qatysty 24 myńnan astam ákimshilik hattama toltyrylǵan. Buǵan qosa, talaptardy buzǵany úshin 10 myńnan asa samokat arnaıy turaqtarǵa qoıylǵan.
Almaty polıtsııa departamentiniń bastyǵy Aıdyn Qabduldınovtiń aıtýyna qaraǵanda, negizgi maqsat — qalalyq mobıldilikti shekteý emes, ony qaýipsiz basqarý.
— Elektrli samokattar búginde jol qozǵalysynyń tolyqqandy qatysýshysyna aınaldy. Sondyqtan olarǵa qoıylatyn talaptar da ózge kólik quraldaryna qoıylatyn erejeler sekildi naqty ári mindetti bolýy tıis, — dedi ol.
Keńes aıasynda kıksherıng operatorlaryna qoıylatyn jańa talaptar da qaraldy. Olardyń qatarynda mindetti saqtandyrý engizý, samokattardy nómirlik belgilermen jabdyqtaý, geozonalaý júıesin qoldaný jáne ІІM derekqorlarymen ıntegratsııa máseleleri bar.
— Mopedterdi retteý tájirıbesi júıeli ári qatań sharalardyń tıimdi ekenin kórsetti. Mundaı tásil jol-kólik oqıǵalaryn azaıtyp, tártipti kúsheıtedi. Dál osy ádis elektrosamokattarǵa da qoldanylady, — dedi Aıdyn Qabduldınov.
Taraptar ózara yntymaqtastyqty jalǵastyrýǵa, profılaktıkalyq jumysty kúsheıtýge jáne jańa talaptarǵa bıznes pen paıdalanýshylardyń kezeń-kezeńimen beıimdelýin qamtamasyz etýge ýaǵdalasty.
Eske salaıyq, buǵan deıin Almatyda bıyl samokat júrgizýshilerine qatysty jańa talaptar kúshine enetinin jazǵan edik.