Elektrli qarmaqpen balyq aýlaǵandar 23 mln teńge aıyppul tóleýi múmkin

ASTANA. KAZINFORM — Jambyl oblysynyń ákimdigi Májilis depýtattaryna elektr togynyń kómegimen balyq aýlaıtyn brakonerlerdi bas bostandyǵyn 5 jylǵa deıin shektep, 6 myń aılyq eseptik kórsetkish (23,6 mln teńge — red.) teńge aıyppul salatyn zań normalaryn engizýdi usyndy.

Bul týraly ákimdiktiń depýtattyq saýalǵa joldaǵan jaýabynda aıtylǵan.

— Qazirgi tańda brakonerler elektr togymen balyq aýlaıdy. Bul problemany sheshý úshin qylmystyq jaýapkershilikti kúsheıtý qajettiligin qoldaımyz. Osyǵan oraı, Qylmystyq Kodekske brakoner elektr togymen balyq resýrstaryn jáne basqa da sý janýarlary men ósimdikterin jappaı joıýdyń tásilin qoldana otyryp jasasa, brakonerdiń múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan on jylǵa deıingi merzimge aıyrý, alty myń aılyq eseptik kórsetkishke deıingi mólsherde aıyppul salý, bes jylǵa deıingi merzimge bas bostandyǵyn shekteý engizýdi usynamyz, — dep jazylǵan jaýapta.

Buǵan deıin Óskemendegi Sogra yqsham aýdanyndaǵy sý qoımasynda balyqtyń qyrylýyna baılanysty tekserý júrip jatqanyn jazǵan edik. 

Sondaı-aq, kesheden beri Ertis-Baıan óńirinde búginnen bastap balyq aýlaýǵa tyıym salyndy. Bul tyıym 30 mamyrǵa deıin kúshinde bolady.