Elektr jáne jylý jelilerin jańǵyrtýǵa 22 mlrd teńge jumsalady
ASTANA. KAZINFORM — Qazaqstan turǵyn úı kompanııasy «Energetıkalyq jáne kommýnaldyq sektorlardyq jańǵyrtý» jónindegi Ulttyq jobasy aıasynda eki iri jobany sýbsıdııalaýdy maquldady. Bul týraly MEKS habarlady.
Olardyń jalpy quny 22 mıllıard teńgeden asady. Qaraǵandy oblysy men Stepnogor qalasynda iske asyrylatyn bul jobalar tozǵan jelilerdi jańartýǵa, energııamen jabdyqtaýdyń senimdiligin arttyrýǵa jáne halyqqa kórsetiletin kommýnaldyq qyzmetterdiń sapasyn jaqsartýǵa múmkindik beredi.
Qaraǵandy oblysyndaǵy elektr jelilerin jańǵyrtý
2026 jylǵy 17 maýsymda «Qazaqstan Turǵyn úı Kompanııasy» AQ Qaraǵandy oblysyndaǵy elektr jelileri nysandaryn qaıta jańǵyrtýǵa baǵyttalǵan «Qaraǵandy Jaryq» JShS jobasyn 16,6 mlrd teńge kóleminde sýbsıdııalaýdy maquldady.
Joba «Karbyshevka – Qaraǵaıly» jáne «Astahovka – Shoqaı» ýchaskelerindegi elektr jelilerin qaıta jańǵyrtýdy, sondaı-aq «RTI» qosalqy stantsııasyn rekonstrýktsııalaýdy kózdeıdi.
«Astahovka – Shoqaı» ýchaskesinde qoldanystaǵy áýe elektr jelisin jóndeý jáne jańa jeli salý josparlanǵan. Trassanyń uzyndyǵy 19,2 km-den 38,4 km-ge deıin ulǵaıyp, jelilerdiń tozý deńgeıi 90%-dan 0%-ǵa deıin tómendeıdi.
Ónerkásiptik aımaqta, Saran qalasynda ornalasqan «RTI» qosalqy stantsııasynda jabdyq tolyqtaı aýystyrylady. Nátıjesinde jalpy transformatorlyq qýattylyq 80 myń kVA-dan 126 myń kVA-ǵa deıin artyp, jabdyqtyń tozýy tolyq joıylady.
«Karbyshevka – Qaraǵaıly» ýchaskesinde de qoldanystaǵy jáne jańa áýe elektr jelilerin salý qarastyrylǵan. Jeliniń uzyndyǵy 39 km-den 78 km-ge deıin ulǵaıyp, tozý deńgeıi 92%-dan 0%-ǵa deıin tómendeıdi. Jobany iske asyrý qajettiligi elektr jelileriniń 90%-ǵa deıin jetken syndarly tozý deńgeıimen baılanysty.
Jobany qarjylandyrý 10 jyl merzimge «Qazaqstannyń Damý banki» AQ usynǵan qaryz qarajaty esebinen júzege asyrylady.
Jobany iske asyrý Qaraǵandy oblysy tutynýshylaryn senimdi elektrmen jabdyqtaýdy qamtamasyz etýge, energetıkalyq ınfraqurylymnyń turaqtylyǵyn arttyrýǵa, sondaı-aq óńirdegi eldi mekender men nysandardy elektr energııasymen qamtýdaǵy yqtımal irkilisterdiń aldyn alýǵa múmkindik beredi.
Stepnogorsk qalasyndaǵy jylý magıstraldaryn qaıta jańǵyrtý
Sondaı-aq 17 maýsymda QTK Stepnogor qalasyndaǵy magıstraldyq jylý jelilerin qaıta jańǵyrtýǵa baǵyttalǵan «Stepnogorsk Teplotranzıt» JShS jobasyn 5,8 mlrd teńge kóleminde sýbsıdııalaýdy maquldady.
Joba aıasynda dıametri 820 mm bolatyn «JEO – Qala» ýchaskesindegi jalpy uzyndyǵy 9,49 km magıstraldyq jylý jelilerin qaıta jańǵyrtý kózdelgen. Joba qazirgi tańda 71,4%-dy quraıtyn jylý jelileriniń joǵary tozý deńgeıi máselesin sheshýge baǵyttalǵan.
QTK tarapynan kórsetilip otyrǵan bul qoldaý óńirlerdiń ınjenerlik ınfraqurylymyn jańǵyrtýǵa, kommýnaldyq jelilerdiń tozý deńgeıin tómendetýge jáne halyqqa kórsetiletin kommýnaldyq qyzmetterdiń sapasy men senimdiligin arttyrýǵa yqpal etedi.
Aıta ketelik SQO-da jylý jáne elektr jelilerin jańǵyrtyp, sapany jaqsartý maqsatynda 12 joba júzege asatyny týraly jazǵan edik.
