Elektr jáne jylý jelilerin dıagnostıkalaýǵa arnalǵan JI engizilip jatyr

ASTANA. KAZINFORM — Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyn júzege asyrý sheńberinde Energetıka mınıstrligi elektr jáne jylý jelileriniń jaı-kúıin dıagnostıkalaýǵa arnalǵan zamanaýı tehnologııalardy engizýdi josparlap otyr. Bul týraly tsıfrlyq damý, ınnovatsııalar jáne aeroǵarysh ónerkásibi vıtse-mınıstri Dmıtrıı Mýn habarlady. 

Jańa tásil boıynsha elektr jelilerin áýeden sholý jáne fotosýretke túsirý úshin drondar paıdalanylady. Bul qazirgideı baǵana basyndaǵy symdardy qolmen tekserý úshin júk kótergish tehnıkany paıdalanýǵa týra keletin jumysy kóp ári qaýiptileý tájirıbeden bas tartýǵa múmkindik beredi. Bolashaqta drondar óz betinshe derbes jumys isteıtin bolady, al jasandy ıntellekt sýretterdi taldap, aqaýlardy anyqtap, táýekelderdi boljap, jeli boıynda úzdiksiz baqylaýdy qamtamasyz etedi. Osyǵan uqsas sheshim jylý jelilerin dıagnostıkalaý úshin de qoldanylady.

— Mundaı tásil munaı salasynda burynnan qoldanylyp keledi, al qalalardaǵy ınfraqurylym úshin jańadan paıda boldy. Bul jylan tárizdi uzyn qurylǵy, kólemi úlken, kóptegen datchıkteri bar. Mine, sol robot qubyr arqyly ótip, onyń 3D modelin jasaıdy jáne qaı jerde aqaýlar, tottar, keptelister bar ekenin anyqtaıdy. Bul ýaqtyly monıtorıng júrgizip, der kezinde áreket etýge kómektesedi, — dep atap ótti vıtse-mınıstr.

Aıta ketelik tsıfrlyq shtab Prezıdent Joldaýyn oryndaý úshin birqatar sheshim qabyldaǵan edi.