Elektr stantsııalarynyń gaz úshin bereshegi 72 mlrd teńgege jetti
ASTANA. KAZINFORM — Taýarlyq gaz úshin eń kóp qaryz bolǵan kásiporyn — Aqtaýdaǵy MAEK. Onyń bereshegi 28,6 mlrd teńge. Onyń ústine, sońǵy jarty jylda qaryz kólemi 20 mlrd teńgege ósken. 2025 jyldyń sońynda MAEK-tiń bereshegi 18 mlrd teńge bolǵan. Bul týraly Energy monitor arnasy jazdy.
Gaz úshin tólemderdiń ýaqytyly túspeýi, sózsiz, QazaqGaz kompanııasynyń qarjylyq jaǵdaıyna áser etedi. Sebebi kompanııa úshin gazdy satý tıimsiz bolyp otyr. 2026 jyldyń alǵashqy jartyjyldyǵynda gaz treıdıngi 119,5 mlrd teńge kóleminde shyǵyn ákelgen.
Gaz treıdınginen bolǵan shyǵyn logıstıka jáne gaz tranzıti baǵyttarynan túsetin kiris esebinen ótelip otyr. Atalǵan baǵyttar 2026 jyldyń alǵashqy alty aıynda 162 mlrd teńge taza paıda ákelgen.
QazaqGaz-dyń 2026 jyldyń birinshi jartyjyldyǵyndaǵy shoǵyrlandyrylǵan taza paıdasy 42 mlrd teńgeni qurady. Bul 2025 jyldyń sáıkes kezeńindegi kórsetkishten 62%-ǵa tómen.
Kompanııanyń shyǵynynyń negizgi sebebi — gazdy satyp alý qunynyń 31%-ǵa ósýi. Atap aıtqanda, bul kórsetkish 436,1 mlrd teńgeden 570,5 mlrd teńgege deıin artqan. Buǵan TShO men «QazRosGaz» tarapynan jetkizilim kóleminiń qysqarýyna baılanysty Reseı gazyn ımporttaý kóleminiń ulǵaıýy sebep bolǵan.
Taýarlyq gazdyń kóterme baǵasy jyl saıyn orta eseppen 33%-ǵa ósip otyrǵanyna qaramastan, bul ázirge gaz treıdıngi baǵytyn tabysty deńgeıge shyǵara almaı otyr.
Aıta keteıik, Qazaqstanda kógildir otynǵa qol jetkizgen halyqtyń úlesi jyl saıyn artyp keledi. Qazir el turǵyndarynyń 64 paıyzy tabıǵı gaz tutynady.
