Elektr stantsııalaryn salý jetkiliksiz: sheteldik sarapshy eldegi energııa tapshylyǵyn sheshý joldaryn atady

ASTANA. KAZINFORM – Qazaqstandaǵy elektr energııasynyń tapshylyǵyn azaıtý úshin jańa qýat kózderin iske qosýmen shektelmeı, energııany únemdeýge jáne kórshi memlekettermen elektr almasý múmkindikterin keńeıtýge basymdyq berý qajet. Bul týraly halyqaralyq sarapshy Konstantınos Balaras Astanada ótken ASHRAE halyqaralyq ınjenerlik qaýymdastyǵynyń baspasóz májilisinde aıtty.

v
Foto: Kazinform

Konferentsııaǵa qatysqan Afına ulttyq observatorııasynyń Qorshaǵan ortany zertteý jáne ornyqty damý ınstıtýtynyń ǵylymı dırektory, ASHRAE qaýymdastyǵynyń múshesi Konstantınos Balaras Qazaqstandaǵy elektr energııasynyń tapshylyǵyna qatysty pikir bildirdi.

Onyń aıtýynsha, elimizde elektr energııasyn óndirý men tutyný arasyndaǵy teńgerim máselesi bar. Degenmen mundaı qıyndyq Qazaqstanǵa ǵana tán emes. Eýropanyń birqatar memleketi de energııaǵa degen suranysty tolyq qamtamasyz etý máselesimen betpe-bet kelip otyr.

– Qazaqstanda elektr energııasynyń tapshylyǵy bar ekeni belgili. Bul burynnan kele jatqan másele. Ony sheshýdiń bir joly – kórshi elderdiń elektr jelilerin ózara baılanystyrý. Osylaısha elektr energııasy jetkilikti memleketter tapshylyqqa tap bolǵan elderge qýat jetkize alady, – dedi Konstantınos Balaras.

Sarapshy elektr energııasyn óndirýdiń balama joldaryn da qarastyrý qajet ekenin aıtty. Sonyń biri – jańartylatyn energııa kózderin damytý. Biraq kún men jelden alynatyn energııanyń kólemi aýa raıyna baılanysty ózgerip otyratyndyqtan, ony saqtaý máselesin de qatar sheshý kerek.

– Ár memleket óz resýrstaryn paıdalanyp, elektr energııasyn óndire alady. Máselen, jańartylatyn energııa kózderin damytýǵa bolady. Alaıda olardyń turaqsyzdyǵyn eskerý qajet. Sondyqtan mundaı qýat kózderin energııa saqtaý júıelerimen birge damytý mańyzdy, – dep túsindirdi ol.

Konstantınos Balarastyń aıtýynsha, energııa tapshylyǵyn azaıtý úshin eń aldymen qolda bar qýatty tıimdi paıdalanyp, elektr energııasyn orynsyz jumsaýdy qysqartý qajet.

– Eń aldymen, energııany bosqa jumsaýdy azaıtýymyz kerek. Sonda túrli salalardaǵy energııa tutyný kólemi tómendeıdi. Al suranys azaıǵan jaǵdaıda ony senimdi qýat kózderi arqyly qamtamasyz etý de jeńildeı túsedi. Sondyqtan energııa tıimdiligin arttyrý barlyq jumystyń bastapqy qadamy bolýy qajet, – dedi sarapshy.

Ol bul baǵytta óndiris oryndarymen qatar qarapaıym turǵyndardyń da úlesi mańyzdy ekenin atap ótti. Qazir ónerkásip salasynda energııany az tutynatyn jabdyqtar ázirlenip jatyr. Degenmen jańa tehnologııalardy engizý ǵana jetkiliksiz, adamdardyń kúndelikti turmysta energııany paıdalaný daǵdysy da ózgerýi kerek.

– Bizdiń ádetterimiz de elektr energııasyn únemdeýde mańyzdy ról atqarady. Osy baǵytta ASHRAE álemniń ár túkpirindegi mamandarǵa kómektesetin standarttar men usynymdar ázirlep keledi, – dedi Konstantınos Balaras.

Aıta keteıik, búgin elordada ASHRAE halyqaralyq ınjenerlik qaýymdastyǵynyń baspasóz konferentsııasy ótti. Jıynda halyqaralyq sarapshylar Qazaqstannyń ınjenerlik ınfraqurylymyn damytý, energııa tıimdiligin arttyrý jáne zamanaýı tehnologııalardy engizý máselelerin talqylady.

Eske salaıyq, buǵan deıin Prezıdent elektr energııasy salasyna qatysty tapsyrma bergen edi.