Elektr stantsııalaryna aýdıt júrgizý bastaldy - Úkimet basshysy

ASTANA. QazAqparat – Elimizdegi elektr stantsııalaryna aýdıt júrgizý bastaldy. Bul jóninde Májilis depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Memleket basshysynyń tapsyrmasyn oryndaý úshin energııa óndirýshi jáne energııa berýshi uıymdarǵa tehnıkalyq aýdıt júrgizý boıynsha jumys bastaldy. Bul jumys eki kezeńmen: birinshi kezeńde – elektr stantsııalaryna jáne ekinshi kezeńde elektr jelilik uıymdarǵa aýdıt júrgizý júzege asyrylady», - delingen Úkimet basshysynyń jaýabynda.

Onyń atap ótýinshe, bastapqy kezeńde saraptama komıssııasy Qazaqstannyń barlyq stantsııalaryndaǵy jabdyqtyń qazirgi jaı-kúıine baǵalaý júrgizip jatyr.

«Energııa óndirýshi uıymdar boıynsha tehnıkalyq aýdıtti 2023 jylǵy birinshi toqsanda aıaqtaý josparlanyp otyr. Júrgizilgen tehnıkalyq aýdıt negizinde jańǵyrtý jáne rekonstrýktsııalaý jónindegi is-sharalardy júrgizý qajettiligine baılanysty árbir stantsııa boıynsha tehnıkalyq usynymdar daıyndalatyn bolady», - dedi Premer-Mınıstr.