Elektr samokatpen jolaýshy, júk tasýǵa tyıym salynady – ІІM

ASTANA. QazAqparat – Іshki ister mınıstrligi elektrli kólik quraldaryn qoldanýdyń erejeleri men talaptaryn eske saldy, dep habarlaıdy QazAqparat tilshisi.

«Sońǵy jyldary balalar ǵana emes, eresekter de belsendi qoldanatyn túrli kólik quraldarynyń sany artty. Ol elektrlik skýterler, samokat, gıroskýterler taǵy basqa. Olar jol qozǵalysynyń qatysýshylary bolyp sanalady. Sondyqtan ishki ister mınıstrligi elektrli skýterlerdi qoldaný erejesiniń baryn eske salady. Elektrli skýter bir adamǵa arnalǵan kólik quraly, maksımaldy jyldamdyq 25 km/saǵ aspaıdy. Onyń aldyńǵy, búıir jáne artqy jaǵy jaryqpen jabdyqtalýy tıis. Jaqyn mańdaǵy adamdardy eskertýge múmkindik beretin dybystyq qurylǵysy bolýy kerek. Jolaýshy qozǵalys barysynda jan-jaǵyna muqııat sholý jasap otyrýy tıis, uıaly telefondy nemese basqa gadjetterdi paıdalanbaý kerek. Sonymen qatar róldi eki qolyńyzben ustańyz, kólik quralyn aqyryn jáne uqypty toqtatyńyz», - dedi Іshki ister mınıstrliginiń ókili Shuǵyla Turlybek vedomstvoda ótken baspasóz máslıhatynda.

Onyń aıtýynsha, elektr skýterdi jaryq jetkiliksiz ári tar jerlerde, sondaı-aq qozǵalysqa kedergi kóp jerde minbegen jón.

«Kólik kóp júretin jáne adamdar kóp bolatyn jerlerden aýlaq bolyńyz. Elektrli skýterde qozǵalý kezinde shlem, sondaı-aq qol, bilek, tize, bas jáne shyntaqty qorǵaıtyn quraldardy paıdalanyńyz. Júk jáne jolaýshy tasymaldamańyz. Jol erejelerin saqtaı otyryp, júretin aýmaǵyńyz ben qozǵalys jyldamdyǵyn tańdaý mańyzdy. Jaıaý júrginshi nemese velosıped minýshige jaqyndap qalǵan kezde eskerý belgisin berińiz», - deıdi ol.

Sondaı-aq, vedomstvo elektr skýterge únemi tehnıkalyq qyzmet kórsetýdi umytpaý kerektigin eskertti.