Elektr qýatynyń joqtyǵynan Atyraý munaı óńdeý zaýyty jumysyn toqtatty
Atyraý munaı óńdeý zaýytynyń aýmaǵynda qara tútin býdaqtap jatyr. Tútinniń býdaqtaǵanyna 2 saǵattan asty.
Zaýyttyń qoǵammen baılanys tobynyń málimetinshe, elektr jelisindegi aqaýdyń saldarynan qondyrǵylardyń jumysy apattyq jaǵdaıda toqtatylǵan.
«Atyraý munaı óńdeý zaýyty búgin, 3 shilde kúni jergilikti ýaqytpen saǵat 17:25-te jumysyn toqtatty. Buǵan «KEGOC» AQ tarapynan elektr energııasynyń óshirilýi sebep boldy. Tehnologııalyq reglamentke sáıkes apatty jaǵdaıdyń aldyn alý maqsatynda elektr energııasynyń syrtqy jelilerin tolyq qalpyna keltirgenge deıin zaýyttyń otyn jelisi fakelge jiberildi. Aqaýlardy joıý nátıjesi týraly qosymsha habarlanady», - dep málim etti zaýyttyń qoǵammen baılanys bóliminen.
Eske sala ketelik, buǵan deıin Atyraý munaı óńdeý zaýytynyń murjasynan qara tútin býdaqtap jatqanyn habarlaǵan edik.
Bıylǵy sáýirde de Atyraý munaı zaýytynyń murjasynda jarty saǵatqa jýyq ot alaýlaǵanyn jazǵan bolatynbyz. «AMÓZ» JShS-niń qoǵammen baılanys bóliminiń aqparaty boıynsha, 27 sáýirde jergilikti ýaqytpen saǵat 16:08-de katalıtıkalyq krekıng qondyrǵysynda tehnologııalyq rejım buzylǵan.
Keıin Atyraý munaı óńdeý zaýytynyń murjasynda taǵy da gaz alaýy janǵan edi. 8 mamyrda paraksılol óndiretin Paramax (PX) tehnologııalyq qondyrǵysyn iske qosý sharasy júrgizilgen. Alaıda, saǵat 19:18-de aldyn ala fraktsııaǵa bólý baǵanyn ystyq tsırkýlıatsııaǵa shyǵarý kezinde qysym klapanynyń jumysynan aqaý shyqqan.
