Elektr tarıfi ózgerdi: Almatyda áleýmettik ótemaqy kólemi qansha bolady

Almatyda 1 qarashadan bastap elektr energııasy tarıfi kóterildi. Bul týraly qalalyq máslıhattyń kezekten tys XI sessııasynda qala ákiminiń orynbasary Asqar Ámrın málim etti, dep habarlaıdy Kazinform.

«Osy jyldyń 1 qarashasynan bastap elektr energııasynyń tarıfi kóterildi. Atap aıtar bolsam, zańdy tulǵalar úshin – 1,2% – ǵa, jeke tulǵalar úshin-1 kvt / saǵ úshin 7% - ǵa»,- dedi Asqar Ámrın.

Kommýnaldyq tarıfterdiń ósýine baılanysty, áleýmettik jaǵynan osal azamattarǵa qosymsha qoldaý kórsetý úshin ótemaqy kólemi 0,6 AEK (2070 teńge) deıin kóterildi. Mundaı sheshim Almaty qalasy máslıhatynyń kezekten tys XI sessııasynda qabyldandy.

Qala ákimi orynbasarynyń sózinshe, ótemaqy mólsherin qaıta qaraý turǵyn úıge áleýmettik kómekti 345 teńgege arttyrýǵa múmkindik beredi.

«Áleýmettik kómek kórsetý merzimi 2024 jylǵy 30 maýsymǵa deıin uzartylady. Bul rette, eger kórsetiletin qyzmetti alýshy 2023 jylǵy 31 jeltoqsandaǵy jaǵdaı boıynsha áleýmettik kómek alýshy bolyp tabylǵan jaǵdaıda, oǵan ótinishsiz áleýmettik kómek taǵaıyndalady, al 2023 jylǵy 31 jeltoqsannan keıin júgingen adamdarǵa áleýmettik kómek ótinish berilgen aıdan bastap taǵaıyndalady jáne tólenedi»,- dep túsindirdi ol.

Buǵan deıin HÁOT sanatyndaǵy almatylyqtar úshin 0,5 AEK ótemaqyny máslıhat osy jyldyń tamyz aıynda bekitken bolatyn. Óıtkeni shilde aıynda kommýnaldyq qyzmetterge tarıfter kóterilgen edi.