Elektr qýatynyń lımıti 749 mlrd teńgege deıin ulǵaıady — Energetıka mınıstrligi

ASTANA. KAZINFORM — Energetıka mınıstrligi eldegi energetıkalyq kásiporyndarda qosymsha qýattardy engizý jáne jumys istep turǵan qýattardy qalpyna keltirý máselesin pysyqtap jatyr. Qazirgi tańda energııa óndirýshi uıymdarmen 23 ınvestıtsııalyq kelisim jasalyp, jumys istep turǵan elektr stantsııalarynda 3,7 GVt qýat qalpyna keltirilýi josparlanyp otyr.

Mınıstrlik málimetinshe, elektr energııasyn tutyný kóleminiń ulǵaıýy jáne tozǵan jabdyqtardyń isten shyǵýy saldarynan bazalyq qýattardyń tapshylyǵy qaýpi áli de saqtalýda. Osyǵan baılanysty qosymsha qýattardy engizý jáne qoldanystaǵy qýattardy qalpyna keltirý sharalary qolǵa alynyp otyr.

— Qazirgi jobalar boıynsha qaıtarymdy ınvestıtsııalardyń qolda bar lımıti 32 mlrd teńge tolyq paıdalanylǵan, sondyqtan qosymsha jobalardy iske asyrý úshin lımıtti ulǵaıtý qajet. Osy oraıda mınıstrlik lımıtti qoldanystaǵy 428 mlrd teńgeden 749 mlrd teńgege deıin kóterý jóninde № 416 buıryqqa túzetýler jobasyn daıyndaǵan, — delingen mınıstrliktiń Kazinform agenttigine bergen jaýabynda.

Bul sharalar iri jobalardy júzege asyrýǵa múmkindik beredi.

Atap aıtqanda, qýaty 550 MVt Ekibastuz GRES‑2 stantsııasynda № 4 energobloktyń qurylysyn bastaý, qorshaǵan ortaǵa lastaýshy zattardyń jıyntyq shyǵaryndylary boıynsha neǵurlym iri, I sanattaǵy elý obektiniń tizbesine engizilgen jumys istep turǵan energııa óndirýshi uıymdarda eń úzdik qoljetimdi tehnıkany engizý, sonyń ishinde «taza kómir» tehnologııasyn paıdalaný arqyly zańnamaǵa sáıkes ekologııalyq talaptardy oryndaý, sondaı-aq qosalqy jabdyqtardy salý jáne jańǵyrtýdy júzege asyrý kózdelgen.

Eske sala keteıik, Energetıka mınıstrligi generatsııalaý sektorynyń ınvestıtsııalyq tartymdylyǵyn arttyrýǵa baǵyttalǵan normatıvtik quqyqtyq akt jobasyn pysyqtady.

Sonymen qatar eldegi 19 elektr stantsııasynda tozý deńgeıi 65 paıyzdan astam ekenin jazǵanbyz.