Elektr qýaty tapshylyǵynan mańyzdy jobalar iske aspaı otyr – Azat Perýashev

ASTANA. KAZINFORM – Elimizde ınvestıtsııalyq jobalardy iske asyrýǵa 8 gıgavatt elektr qýaty jetpeı otyr. Bul týraly Májilis depýtaty Azat Perýashev aıtyp berdi. 

«Aqjol» partııasy – otandyq óndirýshilerdiń partııasy retinde osy elektr qýaty tapshylyǵyn óz kózimizben kórip otyrmyz. Investıtsııalyq jobalar boıynsha aıtsaq, jarııalaǵan jobalardyń birazy tıisti tehnıkalyq jaǵdaı bolmaǵandyqtan iske asyrylmaı otyr. Partııamyzdyń otyrysyna Energetıka mınıstri Almasadam Sátqalıevti shaqyrdyq, ol kisiniń aıtýynsha, ınvestıtsııalyq jobalarǵa qazir 8 gıgavatt elektr qýaty jetpeı otyr», - dedi A. Perýashev elordada máslıhat depýtattarynyń ІІ respýblıkalyq forým kýlýarynda. 

Onyń aıtýynsha, ınvestıtsııalyq joba degenimiz – jańa tehnologııalar, bıýdjetke túsetin tabys, jańa jumys oryndaryn ashý. 

«Sondyqtan qosymsha generatsııanyń qosylýy ekonomıkaǵa úlken serpin beretin edi, biz bul bastamany qoldaımyz. AES-ke qarsy shyǵyp jatqandar «qolymyzdan kelmeıdi», «ony eýropalyqtar isteýi kerek» deıdi. Bul óz ultyna senimsizdik. Men onymen eshqashan kelise almaımyn. Qazaq halqy tek qana mal baǵatyn halyq emes. Bizdiń qolymyzdan tehnologııa da, bilim de, jaýapkershilik te keledi. Óz elimizge senýimiz kerek», - dedi A. Perýashev.

Buǵan deıin Memleket basshysy Qasym-Jomart Toqaev elordada máslıhat depýtattarynyń ІІ respýblıkalyq forýmynda AES qurylysy týraly jalpyulttyq referendým jóninde pikir bildirgen edi.