Elektr kóligin kóbeıtýdi yntalandyrý kerek – Asqar Mamın
NUR-SULTAN. QazAqparat – QR Premer-Mınıstri Asqar Mamın elektr kóliginiń kóbeıýin yntalandyrý jumystaryn jalǵastyrýdy tapsyrdy, dep habarlaıdy QazAqparat tilshisi.
«Ekologııalyq qaýipsizdik jáne shyǵaryndylardy azaıtý álemniń kóptegen elderiniń álemdik jáne ishki saıasatynyń mańyzdy elementi bolyp sanalady. Álemniń jetekshi elderi 2050-2060 jyldarǵa qaraı parnıktik gazdar shyǵaryndysynyń nóldik deńgeıine qol jetkizý maqsatyn qoıyp otyr. Memleket basshysy Qasym-Jomart Kemeluly Toqaev ekologııalyq ahýaldy jaqsartý máselesin basym mindetterdiń biri ekenin belgiledi», - dep atap ótti Premer-Mınıstr Úkimettiń búgingi otyrysynda.
Sonymen birge «Nur Otan» partııasynyń baǵdarlamasyn oryndaý aıasynda 2 mlrd aǵash otyrǵyzý jumystary jáne eldiń soltústik óńirlerin gazdandyrý júrgizilýde, qoqys óńdeıtin 6 zaýyt salynatyn boldy.
«Atmosferanyń lastanýyndaǵy máseleleriniń biri - avtokólik quraldary shyǵaratyn gaz. Qoǵamdyq kólik gazǵa kóshirilip jatyr. Avtoparkti jańartý boıynsha keshendi sharalardy odan ári iske asyrý, otyn sapasy men shyǵaryndylar mólsherin baqylaýdy kúsheıtý qajet. Elektr kóliginiń kóbeıýin yntalandyrý jumysyn jalǵastyrý kerek, mysaly, jýyrda elektromobılderdi kádege jaratý alymy joıyldy. Ekologııalyq turǵydan tıimdi jumys istemeıtin kásiporyndar men jylý elektr ortalyqtarynyń shyǵaryndylary kólemin azaıtý qajet», - dedi Asqar Mamın.
Úkimet basshysynyń aıtýynsha, 2025 jylǵa qaraı qabyldanyp jatqan sharalar 10 qalada atmosferanyń lastaný ındeksin joǵary deńgeıden ortasha deńgeıge deıin tómendetýge jáne jalpy aýa sapasyn jaqsartýǵa múmkindik beredi.
