«Elektr eseptegishin tegin aýystyryp beremiz»: Óskemende alaıaqtar jańa ádiske kóshti

ÓSKEMEN. KAZINFORM – Óskemen qalasynda alaıaqtar ózderin energetıkalyq kompanııa qyzmetkerleri retinde tanystyryp júr.

Sońǵy kúnderi qala turǵyndaryna habarlasyp, ózderin «Birikken energetıkalyq servıstik kompanııa» AQ qyzmetkerleri retinde tanystyratyndar kúrt kóbeıip ketti. Belgili bolǵandaı, bul – azamattardyń jeke derekterine qol jetkizýdi kózdegen alaıaqtardyń kezekti amaly.

Kompanııa baspasóz qyzmetiniń málimetinshe, olar elektr eseptegishterin tekseretindigin nemese eseptegishterdi tegin beretindigin aıtady. Sodan soń kestege qosyp qoıý úshin telefon nómirge kelgen SMS-habarlamadaǵy kodty suraıdy.

Kodty aıtyp jiberseńiz eGov qyzmetkerleriniń atynan qońyraý shalyp, jeke kabınetińizge bireýlerdiń kirip ketkenin aıtyp, sizdi «qorǵap qalý» úshin birneshe qadam jasaýyńyz kerektigin jetkizedi. Osylaısha, sizdi qaqpanǵa túsiredi.

- Osyndaı kezde telefonǵa kelgen kodty aıtýdan aýlaq bolyńyz. Eshkimge jeke aqparattaryńyzdy bermeńiz. Eger kompanııa atynan qońyraý shalǵandar bolsa, onyń ras-ótirigin tekserý úshin 8 (7232) 700-555 telefon nómirine habarlasyńyz, - delingen aqparatta.

Eske salsaq, buǵan deıin Óskemende 91 adamdy shetelge shyǵaramyn dep aldaǵan alaıaq 142 mln teńge paıda kórgeni habarlanǵan.