Elektr energııasynyń tapshylyǵy táýligine 1200 MVt-ty quraıdy - Úkimet

ASTANA. QazAqparat – Elimizde sońǵy eki jylda elektr energııasynyń tapshylyǵy bar, ásirese tapshylyq joǵary júkteme kezinde baıqalady. Bul týraly Premer-Mınıstrdiń birinshi orynbasary Roman Sklıar Energetıka mınıstrliginiń keńeıtilgen alqa otyrysynda málimdedi, dep habarlaıdy QazAqparat tilshisi.

«Elektr energııasy tapshylyǵyn Reseıden óte joǵary baǵa esebinen jabýǵa májbúrmiz. Tapshylyq táýligine 1200 MVt-qa deıin jetedi. Sarapshylar muny tutynýdyń artýymen, tozýymen jáne energetıkalyq ınfraqurylymnyń joǵary apattylyǵymen baılanystyrady. Alaıda, mınıstrlik jyl saıynǵy energııa teńgerimderin qalyptastyrý kezinde, sondaı-aq jańa ónerkásiptik nysandardy iske qosý josparlary týraly bile otyryp, nege eshqandaı shara qoldanbady?», - dedi Roman Sklıar.

Onyń aıtýynsha, elektr qýatymen qamtýda shekteýler bar, bul halyq pen bıznestiń narazylyǵyn týdyrady.

«Jaǵdaıdy jaqyn arada túbegeıli ózgertý kerek. Mınıstrlik pen Samuryq-Qazyna 15 aqpanǵa deıin jańa óndirýshi qýattardy iske qosý merzimderin qysqartý jaǵyn qaıta qarasyn. Bul ásirese Ekibastuz stansasyna qatysty. Jańa nysandardy salýmen qatar qoldanystaǵy ınfraqurylymdy jańǵyrtý da mańyzdy. Jaqyn arada «Tarıfti ınvestıtsııaǵa almastyrý» baǵdarlamasyn iske asyrýǵa kirisý qajet», - dep tolyqtyrdy Úkimet basshysynyń birinshi orynbasary.