Elektr energııasynyń kóterme naryǵyna biryńǵaı satyp alýshy modeli engiziledi

ASTANA. QazAqparat – QR Energetıka mınıstrligi elektr energııasynyń kóterme naryǵynda biryńǵaı satyp alýshynyń modelin engizýdi qarastyryp jatyr. Bul týraly QR Premer-mınıstri Álıhan Smaıylov aıtty, dep habarlaıdy QazAqparat tilshisi.

«Osy jumys aıasynda elektrondy saýda alańynda elektr qýatyn ortalyqtandyrylǵan satyp alý men satýdy kózdeıtin naryqtyń jańa nysanaly modeline kóshý josparlanýda», - dedi Álıhan Smaıylov depýtattyq saýalǵa bergen jaýabynda.

Onyń aıtýynsha, elektr energııasyn ortalyqtandyrylǵan satyp alý-satý modeli alypsatarlyq operatsııalardy boldyrmaýǵa, elektr energııasyn óndirý-tutynýdyń táýliktik kestesine qajetti kólemmen qamtamasyz etýge, generatsııalaý men jabdyqtaý sektorlarynda báseke jasaýǵa múmkindik beredi.

«Energetıka mınıstrligi «QR keıbir zańnamalyq aktilerine jylý energetıkasy jáne elektr energetıkasy máseleleri boıynsha ózgerister men tolyqtyrýlar engizý týraly» zań jobasy sheńberinde «Elektr energetıkasy týraly» zańǵa tıisti túzetýler daıyndady», - dep tolyqtyrdy Úkimet basshysy.