Elektr energııasynyń 3 paıyzyn jańartylatyn energııa kózinen alý kerek - Roman Sklıar
NUR-SULTAN. QazAqparat - 2020 jyly elektr energııasynyń 3 paıyzyn jańartylatyn energııa kózine alý kerek. Bul týraly búgin Energetıka mınıstrliginiń alqa otyrysynda QR Premer-Mınıstriniń orynbasary Roman Sklıar aıtty, dep habarlaıdy QazAqparat tilshisi.
«Tutynýshylardyń elektr jáne jylý energııasymen senimdi jabdyqtalýy - bul elektr energetıkasy salasynyń negizgi mindeti. Muny únemi baqylaýda ustaý qajet. Bul rette jańaratyn energetıkanyń ósim kórsetip otyrǵan naryǵyna aıryqsha nazar aýdarǵan jón», - dedi Úkimet basshysynyń orynbasary.
Roman Sklıar 2019 jyly 2018 jylmen salystyrǵanda 77,8 paıyz ósimmen 2,4 mlrd kVt/saǵat «jasyl» energııa óndirilgenin eske salyp ótti.
«Óndirilgen elektr energııasynyń jalpy kólemindegi «jasyl« energııa úlesi 2,3 paıyzdy qurady. 2020 jyly bul kórsetkishti 3 paıyzǵa deıin ulǵaıtý kerek», - dedi Premer-Mınıstrdiń orynbasary.
Aıta keteıik, QR Energetıka mınıstri Nurlan Noǵaevtyń dereginshe, 2020 jyly jalpy qýaty 605,5 MVt-ty quraıtyn 18 jańaratyn energııa kózderi nysanyn salý josparlanýda. 2020 jyldyń qorytyndysy boıynsha JEK óndirý jospary shamamen 3 mlrd kVt-saǵatty quraıtyn bolady.
