Elektr energııasyndaǵy irkilis: Munaı kásiporyndary mıllıardtaǵan teńgege zalal shekti
Kompanııa málimetinshe, AMÓZ oryn alǵan jaǵdaıǵa qaramastan, jınaqtalǵan qor esebinen munaı ónimderin jóneltýdi jalǵastyryp jatyr. Búgingi tańda zaýyt rezervýarlarynda 26 myń tonna avtobenzın, 34 myń tonna dızel otyny, 1 500 tonna suıytylǵan munaı gazy, 6 myń tonna avıakerosın bar. Bul kólem ónimdi jeti kún boıy turaqty jóneltip otyrýǵa jetkilikti.
AMÓZ basshylyǵynyń aıtýynsha, elektr qýaty turaqty berile bastaǵan sátten zaýyttyń tehnologııalyq qondyrǵylary qalypty jumys rejımine birtindep kóshti. Apta sońyna deıin kásiporyn munaı ónimderin burynǵy kólemde shyǵara bastaıdy dep josparlanyp otyr.
M.Myrzaǵalıev zaýytty qaıta iske qosý jumystarymen tanysqannan keıin elektr qýatynyń úzilýine baılanysty óndiristi jartylaı nemese tolyq toqtatýǵa májbúr bolǵan enshiles uıymdardyń basshylarymen beınekonferents-baılanys arqyly selektorlyq keńes ótkizdi.
Atap aıtqanda, jınalysqa «KPI inc» polıpropılen óndiretin gaz-hımııa zaýyty, «QazTransOıl» AQ, «Magıstarldy sý aǵyzǵy» JShS, «Mańǵystaýmunaıgaz» AQ, «Embimunaıgaz» AQ, «Qarajanbasmunaı» AQ jáne «Ózenmunaıgaz» AQ ókilderi qatysty. Olar kásiporyndardaǵy qazirgi ahýal jaıly aqparat berip, elektr qýatynyń úzilýi saldaryn joıýǵa qatysty nendeı shara atqarylyp jatqanyn baıandady.
Óndiris oryndarynyń basshylary jıyn barysynda elektr qýatyn jetkizýdegi irkilisterdiń jıilep ketkenin, bul óz kezeginde, munaı óndirý isiniń tıimdiligine jáne jospardaǵy kórsetkishterge qol jetkizýge keri áser etetinin atap ótti.
«Bul oqıǵanyń qoǵamdy dúrliktirýiniń sebebi — Atyraý munaı óńdeý zaýyty qala shetinde ornalasqan jáne fakelde janǵan kómirsýtek gazyn turǵyndar óz kózimen kórdi. Al bizdiń ken oryndarda tek sońǵy alty aıdyń ishinde elektr qýaty dál osylaı 11 ret ajyratyldy. Jumysyn toqtatýǵa májbúr bolǵan uńǵymalardyń jalpy sany — 13 myń, aldyn ala esep boıynsha 5 mlrd teńge kólemindegi kiristen aıryldyq», — dedi «Ózenmunaıgaz» AQ bas dırektory Nurdáýlet Qılybaı.
Keńes barysynda sońǵy 2,5 jylda QMG munaı-gaz óndirý aktıvteriniń barlyǵynda elektr qýatynyń úzilýinen jalpy 279 myń tonna munaı óndirilmegeni aıtyldy. Al qaıta iske qosý jumystaryna jumsalǵan shyǵyndy eskere otyryp, joǵaltqan shoǵyrlandyrylǵan qarjylyq paıda 60 mlrd teńgeden asady.
2023 jyly QMG ken oryndarynda elektr qýaty jalpy 153 ret úzilgen, bul 75 myń tonna munaı kóleminiń óndirilimeýine ákeldi.
«Biz elektr energııasyn taratýdaǵy aqaýlardyń jıilep ketkenin baıqap otyrmyz. Eger 2017 jyldan 2019 jylǵa deıin bizdiń kompanııa dál osyndaı sebeppen óndiriste 3 700 tonna munaı joǵaltsa, 2021 jyldan 2023 jylǵa deıin bul kórsetkish 45 myń tonnaǵa deıin ósti. Keshe bizdiń shyǵyn 2,5 myń tonna munaıdy qurady. Qazirgi kezde aldymyzǵa qoıylǵan óndiristik baǵdarlamany oryndaı almaý qaýpi týyndap otyr», — dep atap ótti «Qarajanbasmunaı» AQ bas dırektory Nurseıit Soıýnov.
«Mańǵystaýmunaıgaz» AQ bas dırektory Murat Mustafaev kompanııanyń 2023 jyldyń 6 aıynda elektr qýatynyń úzilýine baılanysty shyǵyndary (1 mlrd 267 mln teńge) ótken eki jyldaǵy shyǵyn kóleminen asyp jyǵylatynyna toqtaldy. Onyń aıtýynsha, bul elektr jelileri ınfraqurylymynyń tozyǵy jetkenin aıǵaqtaıdy.
Jıyn sońynda M.Myrzaǵalıev QMG-niń enshiles uıymdarynyń basshylaryna berilgen elektr qýatynyń artýyna qaraı óndiristi qalypty jumys rejımine birtindep shyǵarýdy tapsyrdy.
«Qyzmetkerlerdiń qaýipsizdigin qamtamasyz etip, jabdyqtarǵa shamadan tys salmaq túsirmes úshin qajetti tehnologııalyq reglamentterdiń saqtalýyn baqylaýǵa alýlaryńyzdy suraımyn», — dep túıindedi ol.
