Elektr energııasyna túngi tarıfti qaıta engizý qajet - Sansyzbaı Esilov

«Astana qalasynyń qorshaǵan ortasyn saýyqtyrý: Іs-qımyl strategııasy men josparyn ázirleý» taqyrybynda sóz sóılegen ol elordanyń Jylý elektr stansasymen qatar qalanyń ortasynda da jeke turǵyn úılerdiń peshinen shyǵatyn tútin qala aýasyn lastap otyr.

«Menińshe, bul problemany kesheýildetpeı sheshý qajet. Onyń birneshe ádisi bar. Kezinde elektr energııasyna saralanǵan tarıf, ıaǵnı túngi tarıf engizgen edik. Sol kezde kóptegen kotedjdiń ıeleri túngi ýaqytta elektr energııasyn paıdalanatyn. Al qazir kúni-túni kómir jaǵyp otyr. Úkimet sebebin túsindirmesten saralanǵan túngi tarıften bas tartty. Al kezinde osy tarıfti engizgen kezde muny elektr energııasyn óndirýshiler úshin de, halyq úshin de jaqsy ári tıimdi bolaryn aıtqan edi. Atalǵan túngi tarıfti qaıtaryp, problemany birshama sheshýge bolady», - dedi ol.

Onyń aıtýynsha,  avtokólik quraldaryn suıytylǵan gazǵa kóshirý de elorda ekologııasyn birshama jaqsarta túsýge septigin tıgizedi.

«Qala ákimdigi birneshe jyldyń ishinde qoǵamdyq kólikti jańartty. Kommýnaldyq kólikterdiń barlyǵy derlik suıytylǵan gazǵa kóshti. Alaıda ótken jyldyń qazan aıynda Energetıka mınıstrligi 2018 jyldan bastap Qazaqstanda suıytylǵan tabıǵı gaz baǵasynyń ósetindigin aıtty. Mınıstrdiń mundaı aqparatyn estigen bıznes ókilderi tabıǵı gazdy qoldanystaǵy qoımalarǵa jınap, jasandy túrde tapshylyq týyndatyp, baǵa kóterilip shyǵa keldi. Búginde jeke sektor úshin suıytylǵan gazdyń 1 kelisi 130 teńge jetip otyr. Eshkim bul problemany sheshpedi, rettegen de joq», - dedi ol.

Sonymen qatar keńes tóraǵasy kezinde Qaraǵandy men Aqmola oblystaryn gazdandyrý týraly Prezıdenti Jarlyǵy jaryq kórgenin eske salyp ótti.

«Búginde bul Jarlyq umyt bolǵan. Qyzylorda oblysynan gaz qubyryn tartý qurylysynyń tehnıkalyq-ekonomıkalyq negizdemesi ǵana jasalyp, odan ary qozǵalmaı tur», - dedi Sansyzbaı Esilov.