Elektr energııasyna tarıfti kóterý naryq talaby - Vladımır Melejık

KÓKShETAÝ. QazAqparat - Qazaqstanda 1 sáýirden bastap elektr energııasynyń tarıfteri ósedi. Tarıftiń kóterilýiniń sebebin týraly «Jambyl GRES» AQ Dırektorlar keńesiniń múshesi, Bas dırektorynyń keńesshisi Vladımır Melejık túsindirdi, dep habarlaıdy QazAqparat tilshisi.

Onyń aıtýynsha, búgingi tańdaǵy tarıf elimizdegi barlyq elektr stansalary úshin tıimsiz. Óıtkeni árbir elektr stansasynyń ózindik quny shekti tarıften áldeqaıda joǵary.

«Shyǵystardyń barlyq baby eskerilmegen, sondyqtan salanyń turaqty damýy úshin elektr energııasyna shekti tarıfterdi jyl saıyn ınflıatsııa deńgeıin eskere otyryp túzetý qajet, bul kóptegen jyldar boıy bolǵan joq. 2009-2015 jyldar aralyǵynda tarıf jyl saıyn ereje boıynsha 1 qańtardan bastap kóterilip, barlyǵy bul týraly bildi, josparlaryn jasap quryp, jańǵyrtý jumystaryn júrgizdi», - dep atap ótti V.Melejık.

Ol atap ótkendeı, 2019 jyly elektr qýaty naryǵy engizildi. Sol kezde, qýat aqysy stansanyń qýatyn arttyrý úshin jańǵyrtý jumystaryn júrgizýge jetkilikti deńgeıde bolady dep boljandy.

«Alaıda, qýat naryǵynyń engizilýimen energııa óndirýshi stansalarǵa elektr energııasyn óndirýge arnalǵan bosatý tarıfi tómendetildi, bul qarjylyq turaqtylyq pen tehnıkalyq tıimdiliktiń nasharlaýyna aıtarlyqtaı áser etti», - dep qosty ol.

V.Melejıktiń aıtýynsha, árbir energııa óndirýshi uıym óziniń barlyq esepteýi men negizdemesi bar qujattar paketin 2020 jyly qaraýǵa jibergen. Osy rette, ol búgingi kúngi túıitkildi máselelerge toqtaldy.

«Biz - energııa óndirýshi uıymbyz. Taratýshy uıym bar, jetkizýshi bar jáne paradoks bar, biz bir tizbekpen baılanysyp, sol ónimdi satamyz, biraq tarıfter bizge ártúrli organdardy bekitedi: Bizge - Energetıka mınıstrligi, al jetkizýshi uıymdar men taratýshylarǵa – Tabıǵı monopolııalardy retteýdi baqylaý departamenti jáne monopolııaǵa qarsy komıtet. Mine, 1 sáýirden bastap energııa óndirýshi tarıf joǵarylaıdy, sońǵylary ótinim beredi jáne olarǵa tarıfti bekitýge shamamen 5-6 aı ketedi. Tıisinshe alymdar joq, olar bizge satyp alynǵan elektr energııasy úshin tólemeıdi. Mundaı kollaps oryn alýda», - dep túıindedi V.Melejık.

Eske sala keteıik, tarıfterdi túzetý 30 naýryzda Qazaqstan Respýblıkasy Energetıka mınıstriniń tıisti buıryǵymen júrgizilgen bolatyn. Osy buıryq 2021 jylǵy 1 sáýirden bastap engizilýi tıis.