Elektr energııasyna 1 teńge qaryz bolsa, jaryqtan ajyratyla ma
«Qazaqstan tutynýshylar lıgasy» qaýymdastyqtyń túsindirýinshe, 2020 jylǵy 24 aqpanda QR Energetıka mınıstriniń keıbir buıryqtaryna ózgerister men tolyqtyrýlar engizý týraly» Qazaqstan Respýblıkasy Energetıka mınıstriniń №43 buıryǵy kúshine endi, ol elektr energııasyn paıdalaný erejelerine qatysty túzetýlerdi bekitken.
Jańa talaptarǵa sáıkes, tutynýshy elektr qýaty úshin aqyny ýaqytynda ne tolyq tólemese, elektr tutyný rejimin buzsa jáne ony joıý týraly talaptardy belgilengen merzimde oryndamasa energııa berýshi (energııa óndirýshi) uıym elektr qýatyn berýdi tolyq nemese ishinara toqtatýǵa quqyly.
«Bul rette energııamen jabdyqtaýshy uıym tutynýshyǵa elektr energııasyn óshirý úshin keminde 5 jumys kúni buryn elektrondyq poshtamen, faks arqyly, poshtamen, mýltımedıalyq habarlamamen ne qoldanystaǵy messendjerler arqyly eskertý habarlamasyn jiberedi», - delingen habarlamada.
Buryn osy erejelerge sáıkes energııamen jabdyqtaýshy uıym tutynýshyny óshirý týraly habarlamamen tanysqany týraly jazbasha rastaýdy alýy tıis bolatyn, endi joǵaryda kórsetilgen tásildermen habarlamany jiberýdi tirkeý ǵana qajet.
Sondaı-aq, sóndirilgen jaǵdaıda qaıta qosylý quny páterde turatyn jeke tulǵalar úshin - 6 730 teńge, jeke úıde turatyn jeke tulǵalarǵa 10 115 teńge, zańdy tulǵalarǵa – 11 606 teńge.
Qazaqstan Respýblıkasynyń Azamattyq is júrgizý kodeksine sáıkes tutynylǵan elektr qýaty úshin debıtorlyq bereshekti óndirip alý notarıýstardyń qaramaǵyna berildi. Atqarý jazbasyn jasaǵany úshin shyǵystar 1,5 AEK (3 977 teńge), 200 myń teńgeden astam bereshek bolǵan jaǵdaıda – bereshek somasynyń 3%- yn quraıdy. Sotqa talap aryz bergen jaǵdaıda bereshek somasynyń 3% mólsherinde sot shyǵyndaryn tóleıdi.
Sonymen qatar, elektr energııasyn qaıta qosý 2 jumys kúni ishinde júrgiziledi.
