Elektr energııasyna qaryzy bar almatylyqtar jaryqtan ajyratylady

ALMATY. KAZINFORM –  «Alataý Jaryq Kompanııasy» AQ Almatyda elektr energııasy úshin bereshekti óndirip alý boıynsha jumysty kúsheıtpek.

Kompanııadan atap ótkendeı, osy jyldyń 12 mamyrynan «AJK» – «EnergoSbyt» AQ fılıaly bereshegi bar tutynýshylarǵa qatysty elektrmen jabdyqtaýdy shekteý sharalaryn kezeń kezeńimen engizýdi bastaıdy.

– Іs-sharalar kún saıyn saǵat 7:00-den 20:00-ge deıin ótkiziledi jáne tek qaryzy bar mekenjaılarǵa áser etedi. Elektrmen jabdyqtaý qaryzdy tolyq tólegenge deıin ýaqytsha toqtatylady. Boryshkerlermen ózara is-qımyl múlik ıeleriniń birlestikteri (MIB) jáne turǵyn úı kooperatıvteri arqyly júzege asyrylady, bul adal tutynýshylar úshin qolaısyzdyqty barynsha azaıtýǵa múmkindik beredi, – delingen habarlamada.

AJK elektr energııasyn berýdi ýaqytsha shekteý shart talaptaryn buzatyn tutynýshylarǵa qatysty eń tıimdi sharalardyń biri ekenin atap ótti.

Ýaqtyly eseptemeý debıtorlyq bereshektiń ósýine ákeledi.

Qazir Almatyda tutynýshylardyń elektr energııasy boıynsha qaryzy 1,2 mlrd teńge.

Abonentterge bereshektiń bar-joǵyn aldyn ala tekserip, aqparatty naqtylaý úshin óz MIB-terine nemese 356-99-99 nómiri boıynsha biryńǵaı baılanys ortalyǵyna tikeleı júginý usynylady.

Osyǵan deıin elde elektr jaryǵynyń shekti tarıfi ózgerýi múmkin ekeni týraly jazǵan edik. 

Eske salaıyq, buǵan deıin Almatyda elektr energııasynyń baǵasy ósken bolatyn.