Elektr energııasyn shekten tys shyǵyndaǵan páter esirtki zerthanasy bolyp shyqty

PAVLODAR. KAZINFORM — Pavlodar prokýrorlary eseptegish arqyly esirtki zerthanasyn tapty. 

Pavlodar qalasynyń prokýratýra qyzmetkerleri qaladaǵy turǵyn úılerdegi elektr energııasyn tutynýdy taldaǵan. Bir páter anomaldy joǵary kórsetkishter kórsetip, mamandar tarapynan kúmán týyndady. 

Alǵashqy tekseristiń nátıjesi kórsetkendeı, terezeler tyǵyz jabylyp, turǵyndar oqshaýlanǵan ómir saltyn júrgizip jatqany anyqtaldy. Barlyq belgiler zańsyz áreketterdi meńzegen. 

— Polıtsııaǵa tintý júrgizý tapsyryldy. Nátıjesinde kúdik rastaldy: páterde esirtki zerthanasy uıymdastyrylǵan. 3 kg-nan astam ósimdik tekti esirtki, gıdropondyq jabdyqtar, tyńaıtqyshtar, oraýyshtar alyndy, — delingen habarlamada.

QR QK-niń 297-1-baby boıynsha sotqa deıingi tergeý júrgizilip jatyr. Kúdikti ustaldy. Tergeý jalǵasady. Bul qylmystyq áreketke qatysy bar basqa tulǵalar anyqtalyp jatyr. 

Buǵan deıin habarlanǵandaı, Ereımentaý turǵyny jasyryn marıhýana ósiretin zerthana ustaǵany úshin 3 jylǵa sottaldy.