Elektr energııasyn óndirý men generatsııaǵa aýqymdy ınvestıtsııa qajet – Senat tóraǵasy
ASTANA. KAZINFORM – Búgin Senat tóraǵasy Máýlen Áshimbaevtyń tóraǵalyǵymen Ornyqty damý salasyndaǵy ulttyq maqsat-mindetterdiń iske asyrylýyna monıtorıng júrgizý jónindegi Parlamenttik komıssııanyń tórtinshi otyrysy ótti.
Іs-sharada qatysýshylar zamanaýı energııa kózderiniń jalpyǵa birdeı taralýyn qamtamasyz etý máselelerin talqylady. Otyrysty ashqan M.Áshimbaev qoljetimdi, turaqty jáne zamanaýı energııa kózderin damytý qazirgi kezde elimiz úshin ózekti másele ekenin aıtty. Qazaqstanda elektr jelileriniń tozýy jaǵdaıdy odan ári ýshyqtyryp otyr. Osyǵan baılanysty, balamaly energııa kózderine basa mán berýdiń jáne «jasyl ekonomıkaǵa» kóshýdiń júıeli tásilderin qalyptastyrýdyń mańyzy arta tústi.
«Halyqtyń elektr energııasymen qamtylǵanyna qaramastan, búginde elektr jelileriniń tozýy úlken problema ekeni jasyryn emes. Elektr energııasyn óndirýge, generatsııaǵa aýqymdy ınvestıtsııa qajet. Elimizde gazdandyrý isi áli de bolsa mańyzdy mindet bolyp qalyp otyr. Jańartylatyn energııa kózderiniń úlesi de óte tómen ekenin aıta ketken jón. Memleket basshysy atap ótkendeı, «jasyl ekonomıkany» damytý – elimizdiń qazirgi kún tártibindegi negizgi basymdyq bolýy qajet. «Jasyl ekonomıkaǵa» kóshý halyqtyń ómir súrý sapasyn arttyrýǵa jáne qorshaǵan ortaǵa júktemeni azaıtyp, tabıǵı resýrstardy únemdi paıdalanýǵa múmkindik beredi. Osy maqsatqa qol jetkizýge yqpal etý – depýtattyq korpýstyń negizgi mindetteriniń biri», – degen Máýlen Áshimbaev áriptesterin osyndaı ortaq maqsattarǵa jetý jolynda kúsh jumyldyrýǵa shaqyrdy.
Parlamenttik komıssııanyń otyrysyna Senat jáne Májilis depýtattarymen birge Energetıka, Ekologııa jáne tabıǵı resýrstar mınıstrleri, Qazaqstandaǵy Birikken Ulttar Uıymy Damý baǵdarlamasynyń turaqty ókili, óńir ákimdikteriniń ókilderi, Senat janyndaǵy Jas sarapshylar klýbynyń músheleri, sondaı-aq, qoǵamdyq jáne halyqaralyq uıymdardyń ókilderi qatysty.
