Elektr energııasy naryǵy úshin elektrondy shot-faktýra jazyp berý merzimi keıinge shegerildi
ASTANA.KAZINFORM - Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken Salyq Kodeksin engizý jónindegi jobalyq keńseniń 11-shi otyrysy burǵan deıin qosymsha pysyqtaýǵa joldanǵan máselelerdi qaraýǵa arnaldy, - dep habarlaıdy Úkimettiń baspaóz qyzmeti.
Birinshi másele «Elektr qýaty naryǵynyń qazaqstandyq operatory» AQ jáne «Jańartylatyn energııa kózderin qoldaý jónindegi qarjy-esep aıyrysý ortalyǵy» JShS úshin shot-faktýralardy jazyp berý merzimin qaıta qaraýǵa qatysty boldy. Buǵan deıin bul másele jobalyq keńseniń 9 otyrysynda qaralyp, onyń qorytyndysy boıynsha qosymsha taldaý týraly sheshim qabyldanǵan edi.
Merzimderdi ózgertý qajettiligi elektr energııasynyń teńgerimdeýshi naryǵynyń jumys ereksheligine baılanysty bolyp otyr: tutyný týraly naqty derek pen eseptik kórsetkish eseptik aıdan keıingi aıdyń 20-synan keıin ǵana qalyptasyp, qoljetimdi bolady.
Osyǵan baılanysty naryq qatysýshylary aldymen qujattardy kúni burynǵy málimetter boıynsha usynýǵa, keıin naqty máni belgili bolǵanda qaıta túzetýge májbúr.
2026 jyldan bastap túzetilgen elektrondy shot-faktýrany alýshy taraptyń mindetti túrde rastaýy talap etiletindikten, qoldanystaǵy merzim qujattardyń durys resimdelýinde táýekel týǵyzyp otyr.
Osyǵan baılanysty salalyq erekshelikti eskere otyryp, EShF-ny jazyp berý merzimin aýystyrý múmkindigin qarastyrý usynyldy.
Talqylaý qorytyndysy boıynsha merzimderdi aýystyrý týraly usynys qoldaý tapty. Naryq operatory men Biryńǵaı satyp alýshy úshin shot-faktýralardy jazyp berýdiń jańa merzimi eseptik aıdan keıingi aıdyń 27-ne deıin dep belgilendi. Tıisti ózgeristi Salyq Kodeksine retrospektıvti túrde engizý, ıaǵnı 2026 jylǵy 1 qańtardan bastap qoldaný josparlanyp otyr.
Sondaı-aq, otyrysta taý-ken-metallýrgııa sektorynda salyq normalaryn, atap aıtqanda, koksteletin kómirge paıdaly qazbalardy óndirýge salynatyn salyqty (PQÓS) qoldaný máselesi qaraldy. Máseleniń kúrdeliligi men kópfaktorlylyǵyn eskere otyryp, kelisilgen sheshimderdi egjeı-tegjeıli zerdeleý men ázirleý úshin ony qaraý taǵy bir aıǵa uzartyldy.
Aıta keteıik, osyǵan deıin Úkimet basshysy ekonomıkany yryqtandyrý oıynsha birqatar jańa tapsyrmalar bergen bolatyn.
