Elektr energııanyń baǵasy qymbattaı ma – mınıstr jaýaby

ASTANA. QazAqparat – Elimizde elektr energııasy baǵasynyń ósýi múmkin be? Atalǵan saýalǵa Energetıka mınıstri Bolat Aqsholaqov Jibek Joly telearnasyna bergen suhbatynda jaýap berdi, dep habarlaıdy QazAqparat tilshisi.

«Qazir tarıfter máselesin kóterip jatqan joq. Buǵan deıin «Tarıfti ınvestıtsııaǵa almastyrý» baǵdarlamasy týraly aıtqan bolatynmyn. Atalǵan baǵdarlama iske qosylǵan kúnniń ózinde bir kúnde tarıfterge áser etpeıdi. Jańa jylý-jaryq elektr ortalyqtaryn salý josparlanýda, olar iske qosylǵannan keıin tarıfterdi qaıta qarastyrýǵa bolady. Biraq biz baǵany ósirýdi josparlap jatqan joqpyz», – dedi Bolat Aqsholaqov efır barysynda.

Aıta ketsek, búgin ótken Energetıka mınıstrliginiń keńeıtilgen alqa otyrysynda Úkimet basshysynyń birinshi orynbasary Roman Sklıar elektr energııasy tapshylyǵy máselesin kótergen edi.

«Elektr energııasy tapshylyǵyn Reseıden óte joǵary baǵa esebinen jabýǵa májbúrmiz. Tapshylyq táýligine 1200 MVt-qa deıin jetedi. Sarapshylar muny tutynýdyń artýymen, tozýymen jáne energetıkalyq ınfraqurylymnyń joǵary apattylyǵymen baılanystyrady. Alaıda, mınıstrlik jyl saıynǵy energııa teńgerimderin qalyptastyrý kezinde, sondaı-aq jańa ónerkásiptik nysandardy iske qosý josparlary týraly bile otyryp, nege eshqandaı shara qoldanbady?», - dep vedomstvo jumysyn synady Roman Sklıar.