Elektr energetıkasyna qatysty zań jobasynyń ataýy ózgerip, ekinshi oqylymda maquldandy

Bul zań jobasy 2013 jylǵy 18 jeltoqsanda Májilistiń jumysyna qabyldanyp, ústimizdegi jyly 14 mamyrda birinshi oqylymda maquldanǵan bolatyn.

Zań jobasy Memleket basshysynyń tapsyrmasyn iske asyrý maqsatynda ázirlengen jáne elektr energetıkasy obektileriniń jumysyn memlekettik baqylaý men qadaǵalaýdy jetildirýge, elektr energetıkasy obektileriniń energetıkalyq jabdyǵynyń tehnıkalyq jaı-kúıin jaqsartýǵa baǵyttalǵan. Sondaı-aq energııa óndiretin jáne energııa beretin uıymdardyń kúzgi-qysqy kezeńdegi jumysy, elektr jáne jylý energııasyn tutynýshylardyń keń tobynyń quqyqtaryn qorǵaý úshin jaýaptylyǵyn arttyrýǵa, energetıka kásiporyndary kórsetetin qyzmetterdiń sapasyn qamtamasyz etýdi kózdeıdi.

QR Parlamenti Májilisiniń depýtaty, atalǵan zań jobasy boıynsha jumys tobynyń jetekshisi Іzbaq Ómirzaqov óz baıandamasynda zań jobasyn ekinshi oqylymda talqylaýǵa daıyndaǵan kezde 26 usynys qaralǵanyn, olardyń 24-i qabyldanyp, ekeýin bastamashylar keri qaıtaryp alǵanyn atap ótti.

Depýtattyń aıtýynsha, «Normatıvtik quqyqtyq aktiler týraly» Qazaqstan Respýblıkasy Zańynyń 17-babynyń 3) tarmaqshasyna sáıkes keltirý maqsatynda zań jobasynyń taqyrybyn ózgertý týraly usynys qabyldandy. Sebebi sonyń sheńberinde elektr energetıkasy obektilerin baqylaýdy jáne qadaǵalaýdy uıymdastyrý ǵana emes, elektr energetıkasy salasyna qatysty basqa da máselelerdi quqyqtyq retteý kózdeledi. Sondyqtan zań jobasynyń taqyryby «Qazaqstan Respýblıkasynyń keıbir zańnamalyq aktilerine elektr energetıkasy máseleleri boıynsha ózgerister men tolyqtyrýlar engizý týraly» bolyp ózgertildi.

Úkimet bekitetin tulǵalardyń tıisti tizbesinde egjeı-tegjeılene túsetin elektr energetıkasy salasyndaǵy tehnıkalyq paıdalaný qaǵıdalaryn jáne qaýipsizdik qaǵıdalaryn bilýdiń biliktilik tekserýlerine jatatyn adamdar tobyn zańnamalyq turǵydan aıqyndaý úshin «Elektr energetıkasy týraly» Zańnyń 13-babyna tıisti tolyqtyrý engizildi.

Jalpy alǵanda, zań jobasy boıynsha jumys tobynyń 18 otyrysy ótkizilgen. Salystyrma kestede 110 pozıtsııa bar. Usynystardyń barlyǵy qabyldandy.

Májilis maquldaǵan atalǵan zań jobasy Senattyń qaraýyna jiberildi.