Elektr energetıkasy salasyndaǵy tarıftik saıasat ózgeretin bolady
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine elektr energetıkasy máseleleri boıynsha ózgerister men tolyqtyrýlar engizý týraly» zań jobasyn maquldady.
Memleket basshysynyń bes ınstıtýtsıonaldyq reformasy aıasyndaǵy «100 naqty qadam» Ult josparyn júzege asyrýǵa baǵyttalǵan zań jobasy elimizdegi elektr energetıkasy salasyn jetildirýge baǵyttalady.
Bul rette birtutas elektr energetıkalyq júıesiniń júkteme kóterýge ázirligin qoldaý úshin biryńǵaı satyp alýshy qurylatyny kózdeledi. Sonymen qatar, elektr energııasynyń ortalyqtandyrylǵan ımporty men eksportyn júzege asyrý úshin Ulttyq operator ınstıtýty engizilmek.
Budan bólek, zań jobasynda salanyń ınvestıtsııalyq tartymdylyǵyn arttyrý maqsatynda elektr energetıkasy salasyndaǵy tarıf saıasatyn ózgertý usynylady. «Búgingi qoldanystaǵy elektr energetıkasyna tarıf eki bólikke bólinedi. Birinshiden, bul aýyspaly bólik, onda elektr energııasyn óndirýge ketken shyǵynnyń ótelimdiligi qamtylady. Ekinshiden, tarıftik qýattylyq boıynsha turaqty bólik. Ol elektr qýattarynyń jańa nysandaryn salýmen qatar, qoldanystaǵy nysandardy jańǵyrtý arqyly ınvestıtsııalyq shyǵyndardyń qaıtarymdylyǵyna negizdeledi», - deıdi zań jobasy boıynsha baıandaǵan Energetıka mınıstri Vladımır Shkolnık.
Aıta keterligi, zań jobasy aıasynda elektr energııasy naryǵynyń aıqyndylyǵy men turaqty jumys isteýin qamtamasyz etý úshin Naryq keńesin qurý qarastyrylady. Tutastaı alǵanda, zań jobasy energııa óndirýshi uıymdar úshin ınvestıtsııalardy qaıtarýdyń uzaqmerzimdi kepildikterin qamtamasyz etýge jaǵdaılar jasamaq. Májilis maquldaǵan zań jobasy Senatqa joldanady.
