Elektr energetıkasy salasyndaǵy aktıvterdi jańartý kerek - mınıstrlik

NUR-SULTAN. QazAqparat – Qazaqstannyń elektr energetıkasy salasyndaǵy eskirgen aktıvterdi jańartý kerek. Bul týraly Ortalyq kommýnıkatsııalar qyzmetinde Energetıka vıtse-mınıstri Jandos Nurmaǵanbetov aıtty, dep habarlaıdy QazAqparat tilshisi.

«Energetıka mınıstrligi elektr energetıkasy salasyndaǵy memlekettik saıasatty iske asyrý jónindegi ýákiletti organ bolyp sanalady. Mınıstrlik tutynýshylardy jáne el ekonomıkasyn energııamen senimdi jabdyqtaý boıynsha sharalar qabyldap jatyr. Qazaqstannyń elektr energetıkasy salasy qoldanystaǵy aktıvterdi jańartýdy qajet etetinin atap ótý qajet. Qoldanystaǵy qýattar ótken ǵasyrdyń 60-70-jyldary salynǵan», - dedi J.Nurmaǵanbetov.

Onyń aıtýynsha, 2021 jyldyń qorytyndysy boıynsha elektr stantsııalarynyń qolda bar qýaty 19,1 GVt, al 2021-2022 jyldardaǵy kúzgi-qysqy kezeńde elektr qýaty 15,4 GVt qurady.

Taratylǵan málimetke qaraǵanda, 2022 jyldyń 7 aıynda elektr energııasyn óndirý 64,993 mlrd kVtsaǵ bolsa, atalǵan kezeńde elektr energııasyn tutyný 64,790 mlrd kVtsaǵ deńgeıine jetti.

«Elektr energııasynyń tapshylyǵyn boldyrmaý maqsatynda Energetıka mınıstrligi tıisti sharalardy qabyldady. Ońtústik óńirde qýaty 330 MVt «Jambyl GRES» AQ 2 energoblogy paıdalanýǵa berildi. Sonymen qatar tapshylyq kezinde maınıng fermalaryna shekteý tetigi engizildi», - dedi vıtse-mınıstr.