Elektr energetıkasy naryǵynda ulttyq operator ınstıtýty engiziledi

ASTANA. QazAqparat - Elimizdiń elektr energetıkasy naryǵynda Ulttyq operator ınstıtýty engiziledi. Bul týraly búgin Senattyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda Energetıka vıtse-mınıstri Baqytjan Jaqsalıev málim etti.

Eske salaıyq, komıtette «Qazaqstan Respýblıkasynyń keıbir zańnamalyq aktilerine elektr energetıkasy máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.

Memleket basshysynyń bes ınstıtýtsıonaldyq reformasy aıasyndaǵy «100 naqty qadam» Ult josparyn júzege asyrýǵa baǵyttalǵan zań jobasy elimizdegi elektr energetıkasy salasyn jetildirýge baǵyttalady.

«Zań jobasyna sáıkes, elimizde birtutas elektr energetıkalyq júıesiniń júkteme kóterýge ázirligin qoldaý úshin biryńǵaı satyp alýshy qurylatyny kózdeledi. Sonymen qatar elektr energııasynyń ortalyqtandyrylǵan ımporty men eksportyn júzege asyrý úshin Ulttyq operator ınstıtýty engizilmek», - dedi vıtse-mınıstr.

Budan bólek, zań jobasynda salanyń ınvestıtsııalyq tartymdylyǵyn arttyrý maqsatynda elektr energetıkasy salasyndaǵy tarıf saıasatyn ózgertý usynylady. Aıta keterligi, zań jobasy aıasynda elektr energııasy naryǵynyń aıqyndylyǵy men turaqty jumys isteýin qamtamasyz etý úshin Naryq keńesin qurý qarastyrylady.

Tutastaı alǵanda, zań jobasy energııa óndirýshi uıymdar úshin ınvestıtsııalardy qaıtarýdyń uzaqmerzimdi kepildikterin qamtamasyz etýge jaǵdaılar jasamaq. Talqylaýdan soń senatorlar qujatty palatanyń jalpy otyrysyna shyǵarý týraly sheshim qabyldady.