Elektr energetıkasy salasyndaǵy memlekettik aýdıtten keıin 16 adam jaýapqa tartyldy
ASTANA. KAZINFORM — Elektr energetıkasy salasyna júrgizilgen aýdıt qorytyndysy boıynsha Joǵary aýdıtorlyq palatanyń tapsyrmalaryn oryndaý sheńberinde 16 adam tártiptik jaýaptylyqqa tartyldy.
— Aýdıt osy jyldyń birinshi jartysynda ótti. Іs-shara nátıjesinde 66 mln teńgege qarjylyq buzýshylyqtar, 2,2 mlrd teńge bıýdjet qarajatynyń tıimsiz josparlanǵany, 104,8 mlrd teńge bıýdjet qarajaty men aktıvterdiń tıimsiz paıdalanylǵany, sondaı-aq 72 rásimdik buzýshylyq pen 35 júıeli kemshilik anyqtaldy, — delingen Joǵary aýdıtorlyq palatanyń habarlamasynda.
Osyǵan baılanysty Joǵary aýdıtorlyq palata aýdıt obektilerine QR zańnamasy men ishki normatıvtik qujattardyń talaptaryn buzǵan qyzmetkerlerdiń jaýaptylyǵyn qaraýdy tapsyrdy.
Nátıjesinde 16 adam tártiptik jaýaptylyqqa tartyldy:
— Energetıka mınıstrligi: departament dırektory;
— «Samuryq-Energo» AQ: «Eneymentau Wind power» JShS-nyń bas dırektory;
— «Elektr energııasy jáne qýaty naryǵynyń qazaqstandyq operatory» AQ: qarjy jónindegi basqarýshy dırektor — basqarma múshesi, tsıfrlyq qamtamasyz etý departamentiniń dırektory;
— «Jańartylatyn energııa kózderin qoldaý jónindegi esep aıyrysý-qarjy ortalyǵy» JShS: bas dırektordyń orynbasary, qarjy departamentiniń býhgalterlik jáne salyqtyq esep bóliminiń bastyǵy, ákimshilik departamentiniń dırektory, elektr energııasy naryǵy departamentiniń energııa óndirýshi uıymdarmen jumys bóliminiń bastyǵy, zań departamentiniń dırektory;
— «Almaty elektr stantsııalary» AQ: paıdalaný jáne jóndeý departamenti merdigerlik jumystar basqarmasynyń bastyǵy, dıspetcherlik basqarmanyń bastyǵy, damý jáne qurylys jónindegi basqarýshy dırektordyń m. a., ekonomıka basqarmasynyń tarıfter bóliminiń bastyǵy.
Sonymen qatar «Jańartylatyn energııa kózderin qoldaý jónindegi qarjy-esep aıyrysý ortalyǵy» JShS-nyń keıbir basshylyq qyzmettegi jumyskerlerimen eńbek sharttary toqtatyldy.
Júrgizilgen memlekettik aýdıt qorytyndylary boıynsha Joǵary aýdıtorlyq palatanyń basqa da tapsyrmalarynyń oryndalýy baqylaýda qalady.
Aıta ketelik memlekettik aýdıt joǵary jetistikter sporty men sporttyq rezervti daıarlaý salasyndaǵy birqatar problema men kemshilikti anyqtaǵany týraly jazǵan edik.