Elektr energetıkasy salasyn damytý jónindegi is-sharalar jospary ázirlendi – Sátqalıev

ASTANA. KAZINFORM – Elimizdiń elektr energetıkasy salasyn damytý jónindegi is-sharalar jospary ázirlendi. Bul týraly búgin Úkimet otyrysynda Energetıka mınıstri Almasadam Sátqalıev aıtty.

«Energetıkalyq qaýipsizdikti saqtaý, el ekonomıkasy men halqyn senimdi energııamen jabdyqtaý qajettigin, sondaı-aq elektr energııasyn tutynýdyń jyl saıynǵy ósýin eskere otyryp, jańa energııa qýattaryn engizý jáne qoldanystaǵy elektr stantsııalaryn jańǵyrtýdy júzege asyrý talap etiledi. Bekitilgen qýat teńgerimine sáıkes 2030 jylǵa qaraı rezervtiń qajetti deńgeıi 17 paıyz bolǵanda elektr qýatynyń qajettiligi 28,2 GVt-ty quraıdy. Bul rette jańa qýattardy eskere otyryp, qolda bar qýat – 22 GVt. Birtutas elektr energetıkalyq júıedegi elektr qýaty tapshylyǵynyń kólemi 6 GVt-tan asady, onyń ishinde shamamen 4 GVt – jańa qýattar», - dedi mınıstr.

Onyń atap ótýinshe, Ortalyq Azııa elderindegi teńgerimdi taldaý 2030 jylǵa qaraı 2,7 GVt kóleminde elektr qýaty tapshylyǵyn kórsetip otyr. Energetıka mınıstrligi osy tapshylyqty jabý jáne eksporttyq áleýetti ulǵaıtý úshin Elektr energetıkasy salasyn damytý jónindegi is-sharalar josparyn ázirledi.

«Munda qosymsha shamamen 26 GVt jańa qýattardy engizý qarastyrylady. Bul jospar buryn Prezıdent janyndaǵy Energetıkalyq keńes otyrysyna shyǵarylǵan. Keıin, memlekettik jáne jergilikti atqarýshy organdardyń usynystaryn eskere otyryp pysyqtaldy», - dedi ol.