Elektr energetıkalyq salanyń qalypty jumys isteýin qamtamasyz etý úshin osy salaǵa arnalǵan tehnıkalyq reglamentter júıesin qalyptastyrý qajet

Bul týraly búgin Astanada ótken energetıkalyq salany damytý perspektıvasyna arnalǵan keńeste vıtse-premer- ındýstrııa jáne jańa tehnologııalar mınıstri Áset Isekeshev aıtty, dep habarlaıdy QazAqparat.

Onyń sózine qaraǵanda, bul rette eń aldymen birinshi kezektegi normatıvtik-quqyqtyq aktiler men tehnıkalyq reglamentterdi ázirleý jónindegi sharalardy qabyldaý qajet. «Ázirge respýblıkamyzda elektr energetıkasy salasyndaǵy quqyqtyq qatynastardy retteıtin birde-bir tehnıkalyq reglament joq, qolda bar normatıvtik-quqyqtyq aktiler kelesi jyldan bastap joıylatyn bolady, óıtkeni qazirgi kúnde bul qujattar mınıstrliktiń buıryqtarymen bekitilgen jáne usynymdyq sıpaty ǵana bar. Bulardyń bir bóligi joıyldy, al qalǵan bóligi - 50-den astam qujat «Jeke kásipkerlik máseleleri jónindegi birqatar zańnamalyq aktilerge ózgertýler men tolyqtyrýlar engizý týraly» zańǵa jáne «Ákimshilik protsedýralar týraly» zańnyń 1-shi bóliminiń 32-shi tarmaǵyna sáıkes, joıylatyn bolady. Sebebi, 2011 jylǵy qańtardyń 1-nen bastap elektr energetıkasy salasyndaǵy sýbektilerge talaptar Úkimettiń qaýlysymen bekitilgen normatıvtik-quqyqtyq aktilerdiń negizinde ǵana qoıylatyn bolady», dedi Á. Isekeshev.

Onyń aıtýynsha, bul úshin jobalaýshy-zertteýshi jáne izdenýshi ınstıtýttardyń áleýeti jeterlik. Bul salada 5-6 ınstıtýt naqty jumys isteýde, sondaı-aq Qazaqstannyń ındýstrııasyn damytý ınstıtýtyn qurý týraly sheshim qabyldanǵan, bul ınstıtýttyń qurylymynda elektr energetıkasyn damytý máselelerimen shuǵyldanatyn bólimshe qurylady.