Elektr beretin kompanııa petropavldyqtarǵa 22,5 mln teńge qaıtarady
PETROPAVL. QazAqparat – Petropavlda energııa tasymalyna ketetin shyǵyndardy tutynýshylar esebinen jaýyp kelgen «Sevkazenergosbyt» JShS zańsyz alǵan 22,5 mln teńgeden astam qarajatty qaıtaratyn boldy, dep habarlaıdy QazAqparat tilshisi.
Tabıǵı monopolııalardy retteý komıtetiniń málimetinshe, sáýir aıynda Soltústik Qazaqstan oblysy boıynsha mamandandyrylǵan ekonomıkalyq sot «Sevkazenergosbyt» JShS-niń tutynýshylar balansyndaǵy jeliler boıynsha jylý shyǵyndary úshin esepteýler júrgizý áreketterin zańsyz dep tanyp, ony toqtatýdy, kásiporynǵa 2020-2021 jyldar aralyǵynda jylý shyǵyndaryn tólegen tutynýshylarǵa qaıta esepteý júrgizýdi mindettedi. Qaıta esepteý nátıjesinde «Sevkazenergosbyt» JShS Petropavl turǵyndaryna jylý shyǵyndary úshin 22,5 mln teńgeden astam qarajatty qaıtarýy tıis. Kásiporyn sheshimmen kelispegenimen, maýsym aıynyń sońynda sot alqasy birinshi satydaǵy sottyń sheshimin ózgerissiz qaldyrdy, apellıatsııalyq shaǵym qanaǵattandyrylmady.
Tutynýshylar bul qarajatty maýsym aıyndaǵy shot-túbirtekterde kóredi, onda qaıta esepteý somasy jeke jolda kórsetilmek.
Eske salaıyq, Tabıǵı monopolııalardy retteý komıtetiniń oblys boıynsha departamentine turǵyndardan «Sevkazenergosbyt» JShS-ǵa qatysty kommýnaldyq tólemderdi esepteý tártibiniń zańǵa saı emestigi jóninde 2021 jyldyń qarasha aıynan birneshe ret shaǵym túsken. Kompanııa teńgerimdik tıesilik shekarasynda ornalasqan eseptegish quraldary bar petropavldyqtardan jylý ysyraptary úshin tólem alyp kelgen.
