Eldos Smetovtiń aýylynda asfalt tóseıtin merdigerler sottasyp jatyr

ASTANA. KAZINFORM — Jambyl oblysynyń ákimi Erbol Qarashókeev Parıj Olımpıadasynyń chempıony Eldos Smetovtiń aýylyna asfalt tóseý jumystary nege osy kúnge deıin keshiktirilgenin aıtty.

«Eldos Smetov chempıon bolmasa, ony quttyqtaýǵa siz barmasańyz, ol aýylǵa asfalt tóselmeıtin be edi?» — dep surady BAQ ókili Parlament palatalarynyń birlesken otyrysynyń aldynda.

Oblys ákiminiń sózinshe, negizi ol aýylǵa asfalt shilde aıynda tóselip qoıý kerek bolǵan.

«Negizi ol aýylǵa qazan aıynda asfalt tóseý josparda bolǵan. Ózderińiz bilesizder, memlekettik satyp alý protsesteri ońaı emes ekenin bilesizder. Eki merdiger sottasyp jatyr. Sondyqtan asfalt tóseý máselesi keshigip keldi. Áıtpese shilde aıynda ol jolǵa asfalt tósep qoıýymyz kerek edi. Ol joldy merdigerler óz tarapynan jasap berdi. Jalpy josparda ol aýyldyń alty álde segiz jolyn jóndeý máselesi bolǵan. Oǵan úlgermeı jatyr», — dedi Erbol Qarashókeev.

Aıta keteıik, Eldos Smetov turatyn aýylǵa dzıýdoshy Parıj Olımpıadasynyń chempıony atanǵannan keıin asfalt tóselgeni áleýmettik jelide qyzý pikirtalas týǵyzǵan edi.