Eldos Smetovtiń bapkeriniń aılyǵyna 4 mln teńge qosyldy
TARAZ. KAZINFORM – Kelesi aıdan bastap Álem chempıonatynyń jeńimpazy Jarqynaı Rahymbaeva jáne qola júldeger Serǵalı Ábilda, bıylǵy Paralımpıadanyń parajúzýden kúmis júldegeri Nurdáýlet Jumaǵalı men bapkeri Sattar Beısembaevtyń jalaqysy ósedi. Al Eldos Smetovtyń bapkeri kelesi olımpıadaǵa deıin aı saıyn 4 mln teńge qosymsha jalaqy alady. Osy aptada ótken Jambyl oblystyq máslıhatynyń sessııasynda osyndaı sheshim qabyldandy.
Jarqynaı Rahymbaeva jáne Serǵalı Ábilda 16-26 tamyz aralyǵynda Kıshınev qalasynda ótken jarysta armrestlıngten júldeger atanǵan bolatyn.
Júldegerler jalaqysynyń kóterilýi Jambyl oblysy ákimdiginiń 2017 jylǵy 27 qarashadaǵy N262 qaýlysyna sáıkes júzege asty. Endi Jarqynaı Rahymbaevanyń buǵan deıin alyp kelgen jalaqysyna - 162 448 teńge, Serǵalı Ábildanyń jalaqysyna - 81 244 teńge, Nurdáýlet Jumaǵalıdyń jalaqysyna - 2 148 744 teńge, Sattar Beısembaevtyń jalaqysyna - 974 668 teńge qosylady.
Bapker Sattar Beısembaev osyǵan deıin 385 044 teńge jalaqy alyp kelse, Nurdáýlet Jumaǵalıdyń jalaqysy 1 271 812 teńge kóleminde bolǵan.
Taǵy bir aıtary, Olımpıada oıyndarynyń altyn júldegeri Eldos Smetovtyń jattyqtyrýshysy Ǵalymjan Jylgeldıevtiń de jalaqysyna qyrkúıek aıynan bastap 4 mln teńge qosyldy. Bul Sport jáne dene shynyqtyrý agenttigi tóraǵasynyń 2014 jylǵy 28 shildedegi buıryǵyna sáıkes júzege asty.
Jambyl oblystyq ekonomıka jáne bıýdjettik josparlaý basqarmasynyń mamandary bul - sportshylardyń álemdik dodalarda júlde alýyna baılanysty jalaqysyna avtomatty túrde qosylatyn tólem ekenin aıtady.
Al, Eldos Smetovtyń jalaqysyna ál-ázirge eshqandaı aqsha qosylǵan joq. Smetov oblys ákiminiń qaýlysyna sáıkes eń joǵary jalaqy - 2 684 000 teńge alady.
Endi Jambyl oblystyq sport basqarmasy qaýlyǵa ózgerister engizip, chempıonnyń da jalaqysyn kóterýge qadamdar jasap jatyr. Bul kelesi jyldan bastap iske asýy múmkin.
