Eldos Smetov: Jaraqatym tolyq jazylǵan joq
NUR-SULTAN. QazAqparat - Dzıýdodan Antalııada ótip jatqan Gran-prı týrnıriniń alǵashqy jarys kúninde qazaq balýany Eldos Smetov top jarǵan bolatyn. Eldos jaraqatynan tolyq aıyqpaǵan, dep habarlaıdy QazAqparat Ulttyq Olımpıada komıtetine silteme jasap.
«Gran-prı syny joǵary deńgeıde ótip jatyr. Uıymdastyrylý jaǵynan kemshilik joq, sportshylardyń deńgeıi joǵary. Barlyq jekpe-jek kezinde jankúıerlerdiń, halqymnyń qoldaýyn sezindim. Jaqynda jaraqat alǵanymdy bilesizder. Iyǵymdy aýyrtyp alǵan soń, Ekaterınbýrgtegi Grand Slam dodasynan bas tartqan edim. Araǵa az ýaqyt salyp, Antalııadaǵy synda top jardym. Dárigerler densaýlyǵymdy baqylap otyr. Jaraqatymnan júz paıyz aıyǵyp kettim dep aıta almaımyn. Iyǵym áli de bolsa aýyrady. Odan bólek, beldesý kezinde qarsylasym tizemnen teýip, taǵy da aýyrsynyp qaldym», - dedi Eldos Smetov.
Degenmen, bul sport. Sportta mundaı kishigirim jaraqat kóp kezdesedi. Eń bastysy - ári qaraı ýshyqtyryp almaý kerek.
«Tokıo Olımpıadasyna irikteý synynda joǵary upaı jınap, tórtjyldyq dodasyna joldama alýdy basty maqsat tuttym. Buıyrsa, sol oıymyzdy júzege asyrýǵa tyrysamyz», - deıdi sportshy.
60 kelidegi Qazaqstan komandasynyń úzdigi Eldos Smetov álemdik reıtıngte 6-shy orynda tur.
Eske sala ketsek, Jakartada ótken Azııa oıyndarynda Eldos Smetovty jaraqat alyp qalǵan edi. Sosyn qazan aıynda tatamıge qaıta oraldy.
