Eldos Smetov jambyldyq jastarǵa sheberlik sabaǵyn ótkizdi
ASTANA. QazAqparat - Rıo Olımpıadasynyń kúmis medal ıegeri, dzıýdodan halyqaralyq dárejedegi sport sheberi Eldos Smetov Taraz memlekettik pedagogıkalyq ınstıtýtynyń sport kesheninde sheberlik sabaǵyn ótkizdi. Bul týraly oqý ornynyń Aqparattyq-ımıdjdik qyzmetiniń jetekshisi Jandar Asan málim etti, dep habarlaıdy QazAqparat.
«TarMPI-dyń 50 jyldyq mereıtoıy qarsańynda uıymdastyrylǵan sharaǵa kúreske qyzyǵýshylyq tanytyp júrgen oqý ornynyń stýdentteri qatysty. Sharshy alańda shashasyna shań juqpaǵan balýan voleıbol, trenajer jáne boks zaldarynda túrli oqý-jattyǵý sabaqtarymen tanysty. Al, kúres zalynda Eldos Smetov balǵyn balýandarǵa dzıýdodan sheberlik synybyn ótkizip, birneshe ádis-tásilderdi kórsetti», - dedi ol.
Onyń aıtýynsha, stýdentter Eldostyń árbir qımyl-qozǵalysyn muqııat baqylap, aıtqan aqyl-keńesterin zeıin qoıyp tyńdady.
«Sondaı-aq, esimi álemge belgili sport sheberi jastarmen suhbattasyp, olardyń qoıǵan suraqtaryna tolyqqandy jaýap berdi. Sheberlik synybynyń sońynda Taraz memlekettik pedagogıkalyq ınstıtýtynyń basshylyǵy Olımpıada júldegerine oqý orny ujymynyń atynan alǵysyn jetkizip, syı-sııapat kórsetti», - dedi Asan.
Aıta keteıik, Eldos Smetov dzıýdodan 2010 jylǵy jastar arasyndaǵy álem chempıony, 2015 jylǵy eresekter arasyndaǵy álem chempıony, 2016 jylǵy Azııa chempıonatynyń jeńimpazy.
Rıo Olımpıadasynda 60 keli salmaq dárejesinde beldesken qazaqstandyq balýan áýeli lıvııalyq Elkabısa Mýhamed Elhadıdi jeńdi. Odan keıin ulybrıtanııalyq Eshlı Makkenzıden jáne ózbekstandyq Dıorbek Ýrozbaevtan aılasyn asyrǵan bolatyn. Jartylaı fınalda ol ázirbaıjandyq Orhan Safarovty qapy qaldyryp, fınalda reseılik Beslan Mýdranovpen kúresti. Asa tartysty ótken beldesýde qos qarsylas negizgi ýaqytta teń shyǵyp, qosymsha kezeńde Reseı sportshysy basym túsken-tin.
