Eldos Smetov shilde aıynyń úzdik sportshysy atandy
NUR-SULTAN. QazAqparat - Qazaqstan Ulttyq Olımpıadalyq komıtetiniń resmı saıtynda «Shilde aıynyń úzdik sportshysyna» daýys berý aıaqtaldy, dep habarlaıdy QazAqparat olympic.kz-ke silteme jasap.
Daýys berý nátıjesi boıynsha dzıýdoshy Eldos Smetov top jardy. Shilde aıynyń úzdigi atanýǵa bes sportshy úmitker boldy. Olar: Dmıtrıı Balandın (júzý), Eldos Smetov (dzıýdo), Andreı Aktaýov (karate), Rýslan Japarov (taekvondo) jáne Otgontsetseg Galbadrah (dzıýdo). Sportshylarǵa daýys berý búgin saǵat 13.00-de toqtatyldy. Nátıjesinde, Býdapeshttegi Gran-prı týrnırinde jeńimpaz atanǵan Eldos Smetov úzdik dep tanyldy. Ol 48,40 paıyz daýys jınaǵan. Ekinshi orynda Andreı Aktaýov (29,56), úshinshi orynda Dmıtrıı Balandın (10,37). Olympic.kz komandasy álemdik arenada el namysyn abyroımen qorǵap júrgen sportshylardy shyn júrekten quttyqtap, Olımpıada qarsańyndaǵy maýsymda sáttilik tileıdi.
