Eldos Smetov Qazaqstan Barysy Grand Slam jarysyn sátti bastady

ASTANA. KAZINFORM – Astanada ótip jatqan dzıýdodan Qazaqstan Barysy Grand Slam jarysyn Qazaqstan quramasynyń úzdigi Eldos Smetov sátti bastady.

Otandasymyz alǵashqy aınalymda portýgalııalyq Rodrıgo Kosta Lopespen kezdesip, «ıppon» ádisimen utty. Endi onyń kelesi qarsylasy Marokko men Vetnam balýandary arasyndaǵy tartystyń jeńimpazy bolmaq. 

Sondaı-aq, osy salmaqta synǵa túsken taǵy eki balýanymyz - Sherzod Davlatov pen Dáýren Súıeýkenov birinshi aınalymnan asa almady. Sherzod Davlatov birinshi beldesýde mońǵolııalyq Nıamsýreenge jol berse, Dáýren Súıeýkenov ázerbaıjandyq Ahmad ıÝsıfovten utyldy.

Al 66 keli salmaqta synǵa túsken Janarys Olımpıadanyń eki dúrkin júldegeri, álem jáne Azııa oıyndarynyń chempıony An Baýldan (Ońtústik Koreıa) aılasyn asyryp ketti. Kezdesý barysynda Janarys eki ret «vazzarı» upaıyn alǵanymen, tóreshiler shegerip tastady. Sodan soń, qazaqstandyq balýan aýyrtý ádisin qoldanǵan. Alaıda, ádis týra beldesý aıaqtalǵan ýaqytta jasalǵandyqtan, esepke alynbady. Desede, qosymsha ýaqytta An Baýl erejege saı emes ádis jasaǵany úshin úshinshi eskertýin alyp, Janarys Rahmetqalı jeńiske jetti. Onyń kelesi qarsylasy - reseılik Murat Shopanov. 

Al osy salmaqtaǵy taǵy bir balýanymyz Nursultan Zaızaǵalıev túrkııalyq qarsylasyna ese jiberdi. 

Bul básekeniń nátıjesinde IJF erejelerine sáıkes jarystyń jeńimpazdary men júldegerleri arasynda álemdik jáne olımpıadalyq reıtıngilerde upaılar bólinedi.

Atap aıtqanda, І oryn úshin 1 000, ІІ oryn úshin – 700, al ІІІ oryn úshin – 500 upaı esepteledi. 
Baıraqty doda 2024 jyly Parıjde ótetin jazǵy Olımpıada oıyndarynyń qarsańyndaǵy sońǵy lıtsenzııalyq Grand Slam jarysy bolmaq.